Jaqynda «Kórme» kórme ortalyǵy men Ulttyq akademııalyq kitaphanada Qazaq ǵylymı-zertteý Mádenıet ınstıtýty «Qazaqstan Respýblıkasynyń mádenı saıasaty tujyrymdamasynyń negizgi qaǵıdalary men tetikterin júzege asyrý» atty taqyrypta dóńgelek ústelder ótkizip, kópshilikti Mádenı qujat jobasyn qoǵamdyq negizde talqylaýǵa qatysýǵa shaqyrdy.
Keńestik dáýirden beri qalyptasyp qalǵan qasań qaǵıda boıynsha mádenıet degenimiz ár adamnyń bos ýaqytynda ǵana kóńil bóletin, sondaı-aq kóbine oıyn-saýyq sıpatyndaǵy sharalar bolsa, endigi ýaqytta ol ulttyq ıdeologııany qalyptastyrýdyń basty quraly retinde qyrýar qyzmet atqarmaq. Keleshekte mundaǵy óner men mádenı uıymdar ekonomıkalyq turǵyda paıda ákeletin tabys kózi deńgeıine deıin jetedi degen paıymdar jańa kezeńge aıaq basqan salanyń endigi kezekte tynys-tirshiliginde de kóp ózgerister oryn alatynyn naqtylaıdy. Mysaly, kınoındýstrııa, balalarǵa, úlkenderge arnalǵan mýltfılmder, sırktik óner, konserttik jáne teatr shyǵarmashylyǵy sııaqty sandaǵan sala tap osy tańda memleket qarjysymen ǵana jan saqtap tursa, al álemdik tájirıbeler buǵan múlde kereǵar jaǵdaılardy aldymyzǵa tosýda. Ásirese, ondaı basymdyqtar jahandaný zamanynda barynsha aıqyndala túsetini zańdy qubylys. Bir ǵana kınoındýstrııanyń ǵalamat týyndylarynyń ózinen elderine qyrýar tabys keltirip otyrǵan álemdik deńgeıdegi kompanııalar qanshama. Mundaı zamanaýı úlgidegi mýzeıler men teatrlar, basqa da mádenı oshaqtar sala qyzmetkerleri úshin úırenetin úrdiske aınalýda. Parlament Senatynyń dóńgelek ústelinde, «Nur Otan» partııasyna qarasty «Mıras» qoǵamdyq keńesi, Ulttyq kásipkerler palatasy men shyǵarmashylyq odaqtary ókilderi otyrystarynda talqylaýdan ótken tujyrymdama jobasy budan ári qaraı shyǵarmashylyq adamdarynyń, kásipkerler men memlekettik organdardyń, BAQ ókilderiniń qatysýymen keńinen talqylanyp jatyr. Mysaly, «Kórme» kórme ortalyǵyndaǵy dóńgelek ústelde Mádenıet mınıstrliginiń saraptama jáne strategııalyq josparlaý departamenti dırektorynyń orynbasary Vıktor Rodıonov, QazǴZMI bas dırektorynyń birinshi orynbasary Andreı Hazbýlatov, N.Sas atyndaǵy memlekettik balalar men jasóspirimder teatrynyń dırektory Nadejda Gorobes, IýNESKO-nyń materıaldyq mádenıet emes mádenı mura máseleleri boıynsha sarapshysy Almıra Naýryzbaeva, Ulttyq mýzeıdiń dırektory Darhan Myńbaı, Ulttyq akademııalyq kitaphananyń dırektory Úmithan Muńalbaeva, M.Gorkıı atyndaǵy memlekettik akademııalyq orys drama teatrynyń dırektory Erkin Qasenov jáne taǵy basqalar tujyrymdama jobasy týraly óz pikir-usynystaryn ortaǵa sala kelip, negizinen mundaǵy máselelermen tolyqtaı kelisetindikterin aıtty.
Dúnıejúzindegi sandaǵan ulttar men memleketterdiń bir-birinen artyqshylyǵy men aıyrmashylyǵy kóp jaǵdaıda mádenı qundylyqtardyń damýymen ólshenýi beker emes. Jetistikterdiń basty sebepshisi bolyp tabylatyn mádenı saıasat sondyqtan da qoǵamdyq qundylyqtar men tulǵa parasatyn qalyptastyratyn memlekettiń ıdeologııalyq belgisi dep eseptelýde. Mádenıet salasyndaǵy jetistikterdi naqty bir jumystyń atqarylýymen, statıstıkalyq kórsetkishtermen, ataqty esimderdiń sanymen ólshegen durys emes. Ony negizinen ulttyq ıdeologııany qalyptastyrý quraly, eldiń álemdik keńistiktegi mádenı damýy men ornyǵýy turǵysynan zerdeleý abzal. Qoǵamnyń shyǵarmashylyq áreketine qatynasyn ózgertetin mádenıet túsinigine baǵyttalǵan zamanaýı tásil jańa áleýmettik mádenı ortany qalyptastyrýdy talap etip otyr. Mundaı jaǵdaılarda dástúrli mádenı ortada túbegeıli aýysym júredi: aldyńǵy orynǵa ushqyrlyq pen básekege qabilettilik shyǵady degen túıindi oıǵa tirelgen mamandar Mádenıet tujyrymdamasy jobasyndaǵy jańashyldyqqa qoldaý bildirdi.
Qarashash TOQSANBAI,
«Egemen Qazaqstan».
Astana.