Jaqynda Shymkent qalasynyń «Nursát» shaǵyn aýdanynda boı kótergen kópqabatty úıden 31 azamatqa páter kilti tapsyryldy. «Jumyspen qamtý-2020» baǵdarlamasy aıasynda salynǵan úıge shalǵaıdaǵy áleýeti tómen aýyldardan kóship kelgen otbasylar men ata-ana qamqorlyǵynsyz qalǵan jandar qonystandy.
Saltanatty sharaǵa qatysqan oblys ákiminiń orynbasary Álı Bektaev qýanysh ıelerine páter kiltin tabystap, quttyqtady.
Ońtústik Qazaqstan oblysynda búginge deıin «Jumyspen qamtý-2020 jol kartasy» baǵdarlamasy sheńberinde qonys aýdarýǵa óńirlik komıssııanyń usynymyn alǵan 449 otbasy salynǵan 6 kópqabatty úıge qonystanǵan. Qonys aýdarǵandardyń ishinen eńbekke qabiletti 614 adamnyń 433-i turaqty jumyspen qamtylyp, 30-y áleýmettik jumys oryndaryna jiberilse, 12 adam kásibı bilim alýda.
«Nursát» shaǵyn aýdany barǵan saıyn qanatyn keńge jaıyp keledi. «Qoljetimdi turǵyn úı - 2020» memlekettik baǵdarlamasy aıasynda salynyp jatqan kópqabatty 84 úıdiń 47-si oblys bıýdjetiniń esebinen qarjylandyrylýda. Onyń 21-i ústimizdegi jyly paıdalanýǵa berilmek. Bul úılerdegi páterlerdiń basym bóligi áleýmettik álsiz toptarǵa arnalǵan.
Shaǵyn aýdan shyǵysyndaǵy iskerlik-ákimshilik ortalyǵynda da jańa ǵımarattar boı kóterýde.
Shymkent qalasynda, sondaı-aq, 140 oryndyq «Arýjan» balabaqshasy el ıgiligine tapsyryldy. Kezinde jekemenshikke ótip ketken bul ǵımarat búginde memleketke qaıtarylyp, mektepke deıingi mekeme retinde qaıta quryldy. Igilikti sharaǵa arnaıy kelgen Shymkent qalasynyń ákimi Darhan Satybaldy búldirshinder men pedagogıkalyq ujymdy balabaqshanyń ashylýymen quttyqtap, ǵımaratty aralap kórdi.
BAQ ókilderine suhbat bergen qala ákimi D.Satybaldy: «Oblys ortalyǵy Shymkent qalasynda «Balapan» baǵdarlamasy aıasynda búldirshinderdi qamtý 2009 jyly 28 paıyz bolsa, bıyl 70 paıyzdy qurap otyr», − dedi.
Búginde Shymkent qalasynda 256 balabaqshada 41 myńnan astam bala tárbıelenýde.
Marhabat BAIǴUT,
«Egemen Qazaqstan».