«Qazfosfat» JShS Jambyl óńirinde ǵana emes, elimiz boıynsha hımııa óndirisiniń lokomotıvi sanalatyny burynnan belgili. Áıtse de ilgeride 7 myńnan asa azamatty jumyspen qamtyp otyrǵan alyp seriktestiktiń qyzmetkerleri basshylyq jaǵdaıymyzdy jasasa degendi jıi aıtyp júretin. Keıingi jyldary olardyń oryndy talabyna jańa basshylyq nazar aýdara bastady.
72 otbasynyń máselesi sheshildi
Memleket basshysy Qasym-Jomart Toqaev birer jyl buryn elimizdegi iri ári áleýetti kompanııalar men alyp seriktestik basshylaryna áleýmettik jobalardy júzege asyrýdy shegelep tapsyrǵany belgili. Prezıdent pármenin «Qazfosfat» JShS-niń jańadan taǵaıyndalǵan basshylary da nazardan tys qaldyrǵan joq. Olar birinshi kezekte jumysshylardyń jaǵdaıyn jasaýǵa bilek túrip kirisken syńaıly. Basshylyq aldymen qyzmetkerlerdiń áleýmettik máselelerin sheshýge aıryqsha den qoıǵan. Osy oraıda seriktestik basshylarymen júzdesip, birqatar tirliktiń tııanaqty atqarylǵanyna kóz jetkizgendeı boldyq.
«Qazfosfat» JShS-niń bas dırektory Ǵanı Toqsanbaevtyń aıtýynsha, keıingi ýaqytta kásiporyn basshylyǵy seriktestik qyzmetkerlerin turǵyn úımen qamtý, jumysshylardyń jalaqysyn múmkindiginshe arttyrý, óńirdegi abattandyrý jumystaryna atsalysý sekildi ózge de máselelerdi nazarǵa alyp otyr.
«Keıingi ýaqytta seriktestikte eńbek etetin qyzmetkerlerdi baspanamen qamtamasyz etý máselesin sheshýge aıryqsha den qoıdyq. О́tken jyly kásiporyn qyzmetkerlerine Qarataý qalasynan 72 páterdiń kilti tabystaldy. Qonys toıyn toılaǵandardyń qatarynda kópbalaly otbasylar, ardagerler men múgedekter, sondaı-aq «Sholaqtaý» taý-ken óńdeý kesheniniń qyzmetkerleri bar. Jańa páterge qonystanǵan azamattardyń júzinen shattyqtyń lebi aıqyn ańǵarylyp turdy. Bul azamattar osyǵan deıin qajetti turǵyn úımen qamtylmaǵan. Basshylyq turǵyn úı máselesinen bólek, balalarǵa arnalǵan oıyn jáne sport alańdary, vorkaýt aımaǵy bar jańa saıabaq salǵanyn aıta ketken lázim dep oılaımyn. Kompanııa qyzmetkerleriniń balalary bos ýaqytyn paıdaly ótkizýi úshin turǵyn úı janynan fýtbol men basketbol alańdary salyndy. Osylaısha, ýaqytynda ıesiz jatqan alqap qazir adam tanymastaı bolyp ózgerdi. Jaryqtandyrý jumystary júrgizilgennen keıin aýlada otyrǵyzylǵan aǵashtar men kógaldardyń kóshetteri adam janyna jaıly atmosfera syılap tur», deıdi Ǵ.Toqsanbaev
Jumysshylar 226 pátermen qamtylady
Kásiporyn basshysy keltirgen derekke zer salsaq, jumysshylardy turǵyn úımen qamtamasyz etý baǵdarlamasy bıyl da qarqyndy túrde júrip jatyr. Jańatas qalasyndaǵy «Úsh Bı» turǵyn úı kesheniniń qurylysy aıaqtalǵannan keıin seriktestik qyzmetkerleri, jas mamandar jáne az qamtylǵan 226 otbasy páterli bolmaq. Búginde bul elimizdegi iri kásiporyndar arasyndaǵy rekordtyq kórsetkish bolyp tur. Turǵyn úı keshenine tıesili sport zal da úzdiksiz jumys isteıdi, al turǵyndardyń bos ýaqytyn tıimdi paıdalanýy úshin jasyl jelekpen kómkerilgen alleıaǵa jańǵyrtý jumystary júrgiziledi.
«Ashyǵyn aıtsaq, kompanııanyń eki jylda júrgizgen jumystarynyń nátıjesinde turǵyn úıge muqtaj úsh júzden asa otbasynyń máselesi oń sheshim taýyp otyr. Bul jumysshylarǵa kórsetilgen úlken qoldaý ekenine eshkim kúmán keltire almaıdy. Budan bólek, biz «Otbasy bank» AQ-men birlesip, kompanııa qyzmetkerlerine jeńildetilgen nesıe máselesin qarastyryp otyrmyz. Nátıjesinde, seriktestik qyzmetkerleri úshin tıimdi qaryz berý máselesi sheshimin tabady», deıdi «Qazfosfat» JShS bas dırektory.
Kompanııa basshylyǵy qolǵa alǵan jumystar munymen tolastamaıdy. «Qazfosfat» JShS-ne qarasty barlyq jumys isteıtin bólimsheler ornalasqan óńirlerdi abattandyrý máselesi de nazardan tys qalǵan emes. Naqtyraq aıtar bolsaq, 2021 jyly kásiporyn jetekshileri Taraz qalasyndaǵy «Úshbulaq» jaǵalaýyn tolyqtaı qalypqa keltirdi. Jaǵalaý boıyndaǵy aýmaq abattandyrylyp, aǵashtar men kógaldar otyrǵyzyldy. Sondaı-aq demalýǵa yńǵaıly oryndyqtar ornatyldy, balalarǵa arnalǵan oıyn alańy da ýaqyt talabyna saı jabdyqtaldy. О́zenge qaýipsiz pırs salynǵanyn da aıta ketken jón. Sonymen qatar uzaq jyldar boıy jumys istemeı turǵan jaıaý júrginshiler kópirin tolyǵymen jóndedi. Mundaǵy serýendeýge arnalǵan jasandy aımaq ta qala turǵyndarynyń súıikti ornyna aınaldy.
Shaıqoryqta saıabaq salynady
Kompanııa basshylary buǵan deıin qolǵa alynǵan ilkimdi isterdi odan ármen qaraı sátimen jalǵastyrý máselesin de oılastyryp otyr. О́ıtkeni óńirde atqarylatyn jumystar az emes.
«Oblys ortalyǵy Taraz qalasynyń mańyndaǵy Shaıqoryq aýylynan demalys saıabaǵyn salýdy qolǵa almaqpyz. Turǵyndar bos ýaqytyn tekke ótkizbeýi kerek. Olardyń sportpen shuǵyldanýy úshin munda zamanaýı sporttyq qurylǵylar ornatylyp, qajetti qural-jabdyqtar ornalastyrylady. Balalar úshin arnaıy jeke oıyn alańdary salynatynyn da atap ótken jón. Kompanııa jetekshileri mundaı ıgilikti bastamany tek Jambyl oblysynda ǵana emes, «Qazfosfat» JShS bólimsheleri ornalasqan basqa óńirlerde de iske asyrady. Túrkistan oblysynyń Qumkent aýylynda kásiporyn kóshelerdi jaryqtandyrý jobasyn qarjylandyrýdy josparlap otyr. Mundaı is-shara aýyl kóshelerindegi qaýipsizdikti qamtamasyz etýge aıtarlyqtaı yqpal etetini aqıqat. Buǵan qosa qamqorlyqqa zárý adamdarǵa, ardagerlerge jáne balalar úılerine kómektesetin qoǵamdyq uıymdardy qoldaýǵa erekshe nazar aýdaramyz. Jambyl oblysynda qaıyrymdylyq is-sharalaryna 2022 jyly 1,2 mlrd teńge bóldik. Mundaı belsendi qaıyrymdylyq jumystary aldaǵy ýaqytta da jalǵasady», deıdi Ǵ.Toqsanbaev.
Elimizdegi eń iri kompanııalardyń biri keıingi jyldary jumysshylardy tegin taǵammen qamtamasyz etý máselesin sheshti. Qazirgi ýaqytta táýligine 6 myńǵa jýyq jumysshy ystyq tamaqpen qamtylǵan. Sondaı-aq Qarataý qalasynyń mańynda ornalasqan «Kóktal» emdeý-saýyqtyrý keshenin kúrdelýi jóndeýden ótkizdi. Nátıjesinde, emdeý blogi jańartylyp, bes ǵımarat jóndeldi. Atqarylǵan jumystardyń nátıjesinde munda demalýshylardyń sany eki esege deıin artyp otyr.
Birneshe jyldyń bederinde kompanııa qyzmetkerleri jalaqyny kóterý máselesin alǵa tartyp júrgen. Qyzmetkerlerdiń oryndy talaby da kompanııa basshylarynyń nazarynan tys qalmaǵany qýantady. Aıtýynsha, jumysshylardyń eńbekaqysy qańtar aıynda 50 myń teńgege artsa, 1 maýsymnan bastap taǵy 30 myńǵa kóbeıtilmek. Bul, árıne, qarapaıym eńbekkerler úshin úlken qoldaý ekeni daýsyz. Qyzmetkerlerge kórsetilip jatqan ózge de áleýmettik kómekter jetkilikti. Az kúnde jumysshylardyń balalary demalatyn jazǵy lager iske qosylady.
«Qazfosfat» JShS basshylyǵy birinshi kezekte qyzmetkerlerdiń áleýmettik jaǵdaıyn túzetýge aıryqsha den qoıǵany rasymen de kóptegen iri kompanııaǵa úlgi desek bolady. Bul baǵyttaǵy jumystardyń aldaǵy ýaqytta nazardan tys qalmaıtyny sózsiz.
Jambyl oblysy