Nege ekenin kim bilsin, áıteýir ara-tura ánnen mán izdeıtinimiz bar. Ánshiler shyrqaǵan shyǵarmalardan poezııa izdep sharq uramyz. Biraq qazir bári basqasha. Mátindegi mánnen góri, aspaptardyń únimen ádipteý sánge aınalyp bara jatqany ras.
Birer jyl buryn «Despacito» degen án hıtke aınalǵany belgili. Bilikti mamandardyń aıtýynsha, «You Tube» arnasynda 8,1 mıllıard qaralym jınaǵan hıt tym qarapaıym ári qarabaıyr shyǵarma eken. Tórt akkord bastan-aıaq aýyspaıdy desedi mamandar. Alaıda sol qarabaıyr týyndy álem jurtyn tamsandyryp tastady ǵoı. Qaralymy – 8,1 mıllıard. Jalpy, Jer sharyndaǵy adamnyń bári kórip shyqqan ba sonda?
Jeńiltek ánderden sharshaǵanda salmaqty shyǵarmany, kóńil pernesin dóp basatyn ándi izdeıtinimiz taǵy bar. Aqyn Serik Tomanovtyń óleńine jazylǵan «Sezimdi qaıtem, týlaǵan» áni kompozıtor Sársenbek Bákirdiń talǵamyna saı kelgeni sózsiz. Aqynnyń ózi «sandýǵash úndi, sarǵaldaq óńdi sary bala» dep ataǵan Sársenbek jazǵan án de jalpyhalyqtyq hıt bolyp edi.
Baıaý yrǵaqty tamasha týyndyny esti tyńdarman áli umyta qoıǵan joq. О́ıtkeni ánniń mátini men mýzykasynyń úılesim tabýynyń arqasynda shyǵarma tyńdarman qaýymnyń júreginen oryn alǵany aqıqat. Talǵamy joǵary kompozıtor birinshi kezekte ánniń mátinine nazar aýdarsa kerek.
«Kózińdi qaıtem,
qaraıtyn maǵan urlana,
Sózińdi qaıtem,
sıqyrly sazdy dýman án.
Tózimdi qoıshy, taýsylar seni kútýden,
Sezimdi qaıtem, sezimdi qaıtem,
sezimdi qaıtem týlaǵan»,
dep bastalatyn ánniń alǵashqy shýmaǵynyń ózi ánge ańsary aýǵan tyńdarmanyn birden baýrap alatyny shyndyq.
Árıne, qazirgi jastardyń bir bóligi trendtegi ánderge den qoıǵandyqtan, retroǵa aınala bastaǵan týyndylar kóp tyńdala bermeıtindeı kórinedi. Alaıda kólikte ketip bara jatqanda orta býyn ókilderi osy bir tamasha shyǵarmany tyńdap otyrǵanyn kórgende qýanyp qalamyz. Bastysy, kompozıtor men aqynnyń talǵamynan, úılesiminen týǵan eski ári esti shyǵarmany jurttyń jadynan shyǵarmaǵany kóńilge medeý bolady.
Áýlıeatanyń shaıyrlary týraly sóz qozǵalsa, á degennen Serik Tomanovtyń esimin ataıtyndar az emes qoı. О́rnegi ózgeshe óleńderimen Jambyl jurtshylyǵynyń jadynda óshpes iz qaldyrǵan aqynnyń óleńine jazylǵan ánder de Tomanov bıigin alasartpaı turǵandaı kórinedi. Oǵan eshkimniń talasy joq.
«Kúnderdi qaıtem,
synaptaı syrǵyp zýlaǵan,
Túnderdi qaıtem,
uıqymdy meniń urlaǵan.
О́zimdi qoıshy, ózegim jalyn órtegen,
Sezimdi qaıtem, sezimdi qaıtem,
sezimdi qaıtem, týlaǵan.
Syrymdy qaıtem,
syńar bop saǵan týmaǵan,
Muńymdy qaıtem,
Májnúnniń jolyn qýmaǵan.
О́mirdi qoıshy, óter de keter ókintip,
Sezimdi qaıtem, sezimdi qaıtem,
sezimdi qaıtem, týlaǵan».
Uzyn-yrǵasy úsh shýmaqtan turatyn Sársenbektiń osy ánin keıingi tolqyn da gıtaramen oryndap júrgenin kóz shalyp qalady. Ásirese saıabaqtarda serýendep, keshqurym el ortasynda júrip án shyrqaıtyn meloman jastardyń aýzynan estigende, rasymen de janyń raqattanyp qalady. 18-20 jas shamasyndaǵy jastardyń tanymy quldyramaǵanyna, talǵamynyń tómendemegenine shúkir deısiń.
Saǵynyshqa toly mahabbat syry tunyp turǵan «Sezimdi qaıtem, týlaǵan» ánin jurt áýelde «Nur-Muqasan» dýetiniń oryndaýynda jyly qabyldaǵany álimsaqtan aıan. Keıin ózge de ánshiler syrshyl shyǵarmany naqyshyna keltirip shyrqap, áýezdi týyndyǵa ekinshi ómir syılaǵanyn kórip júrmiz.
Qalaı desek te, aıtary bar ánniń ǵumyry kelte bolmaıtyny daýsyz. О́ıtkeni ol mezettik melodııa men sáttik ıllıýzııanyń jemisi emes. Esti ánniń óz taǵdyry bolady.
«Sezimdi qaıtem, týlaǵan» áni tyńdarmannyń talǵamynan oza týǵan shyǵarma ekenine eshkimniń kúmáni joq. Sodan da bolsa kerek, ónersúıer qaýymnyń júreginen, oıynan óshpeı turǵany, tyńdarmanymen birge jasap kele jatqany. Mundaı tamasha ánderdiń aýdıtorııasynan ajyramaǵany qazaq halqy áli de bolsa talǵamsyzdyq dertine shaldyqpaǵanyn aıǵaqtaı tússe kerek.
Jambyl oblysy