Melodııa adam balasyn eliktirip qana qoımaıdy, keıde tipti eritip, eljiretip te jiberedi. О́ıtkeni sazda da sóz bar. Al áni men sózi qatar úılesken shyǵarma kimdi de bolsyn, beıjaı qaldyrmaıtyny anyq. Oǵan eshkimniń talasy joq ta shyǵar.
Qazaq estradasyna jańa bir leppen kelgen trıo – «ABK». Alǵashqy «úshtik» kezinde tarap ketkenimen, sol jyldarda trendke aınalǵan ánderi áli de jurttyń jadynan óshken joq. Sebebi ádemi ánniń ǵumyry qashanda uzaq. Al «ABK» qazaq melomenderiniń qulaq quryshyn qandyratyn talaı ándi shyrqady...
Áıgili toptyń oryndaýynda eldiń júregine jetken ǵajap án jıyrma jyldan astam ýaqyt buryn shyn máninde hıtke aınalǵanyna eshkimniń talasy joq. Dıski men fleshkanyń dáýiri týmaı turǵan ýaqyt, ıaǵnı avtokólik ataýlyda kasseta tolyp turatyn. Sol kezde eski magnıtafonnan «Terezemdi urmańdarshy, tamshylar» áni jıi shyrqalatyn. Mýzykanyń qudireti de sol shyǵar, baıaý yrǵaqty ánniń mátini men áýeni tyńdarmanyn birden ózine baýrap alatyn.
Ánniń mátini rasynda da adam balasynyń kóńil aýanyn astan-kesten etetini daýsyz. Tyńdap otyryp, lırıkalyq týyndynyń sarqylmas saǵynyshpen astasyp jatatynyn birden ańǵarasyń. Al «óz júregiń óz keýdeńe syımastan, uıyqtaı almaı shyqtyń ba álde saǵynyp» dep keletin eki tarmaqtan alystaǵy ǵashyqtyń únin birden estıtiniń taǵy ras. Ǵashyqtyq ǵazaldyń ón boıyndaǵy tereń mazmun áýenge sóz jazylmaǵanyn, kádimgi óleńge án jazylǵanyn ańǵartyp turatyndaı kórinetin.
Elý jyldan astam ýaqyt buryn jazylǵan án áli kúnge deıin túrli is-sharada shyrqalyp jatady. Árıne, ártúrli ánshilerdiń oryndaýynda. San túrli daýys pen ár alýan boıaý birden ańǵarylady.
Keıbir ánshiler ýaqyttyń aǵymyna saı shyǵarmanyń oryndalýyna jańasha bir elementter qosqanymen, bizge baıyrǵy ún, eski rıtm ystyq kórinedi de turady. О́ıtkeni týyndyda ómir bar. Sonysymen de adamdy ózine tartatyn magnıti shyǵar... Aqyn men kompozıtordyń jan álemindegi nostalgııanyń úılesimi tyńdarmanǵa birden seziledi. Sonysymen shynaıy kórinedi.
«Kirpigimnen, kirpigimnen týlap
jatty tamshylar,
Báz bireýler buǵan sirá tań shyǵar, tań shyǵar.
Seni ańsaǵan, seni ańsaǵan, kóńilimde erigen,
Ańsaýlardyń monshaǵy da bar shyǵar, bar shyǵar.
Terezemdi urmańdarshy, tamshylar.
Izdeısiń sen, izdep júrsiń sabyla,
Janaryńnan arman oty jaǵylar.
О́z júregiń óz keýdeńe syımastan,
Uıyqtaı almaı shyqtyń ba álde saǵynyp?» dep keletin joldar rasynda da adam janynyń emshisindeı kórinetini bar.
Derekterge kóz júgirtsek, kompozıtor Ahmadııar Esmuqanov ánniń mátinin О́tegen Kúmisbaevtyń «Aq monshaq» atty jyr jınaǵynan alypty. Biraz ýaqyt keýdesin kernegen shyǵarmaǵa mátin tapqanda kompozıtor tóbesi kókke eki eli jetkendeı qýanǵan eken. BAQ-ta jazylǵan málimetterge zer salsaq, aqyn jazǵan óleńniń ataýy «Iýnost» meımanhanasyndaǵy jańbyrly tún» dep atalǵan. Kompozıtor ony «Tamshylar» dep ózgertipti.
Ánniń ólmeıtin týyndyǵa aınalýy úshin kompozıtor izdenistiń izine túskeni jón-aq. Ahmadııar Esmuqanovtyń áldekimderge tapsyrys bermeı, izdengeni, aqyry izdegenin tapqany rasynda da talaı ánshige úlgi ekenine kúmán joq.
«Ańsaýlardyń monshaǵy da bar shyǵar, terezemdi urmańdarshy, tamshylar»... Aqynda qııal men qısyn bolmasa, óleńniń túpki mazmuny qaıdan ashylsyn? Mundaǵy «ańsaýlardyń monshaǵy da», «terezeni urǵan tamshylar da» janarǵa keptelgen túıirshikteı saǵynysh tamshysyn eriksiz eske túsiretini aqıqat...
Zymyrandaı zýlaǵan jyldar jylystaı beredi. Alaıda shyn óner qansha ýaqyt ótse de ólmeıtini anyq. Bir emes, birneshe býynnyń súıikti ánine aınalǵan «Tamshylar» qaı kezde de tyńdarmannyń, ónersúıer qaýymnyń júreginen óshpeıtini daýsyz. О́ıtkeni sarqylmas saǵynyshtan dúnıege kelgen tamasha týyndy kez kelgen adamnyń boıyndaǵy nostalgııalyq sátter men sezimniń shoǵyn úrleı túsedi. Retro ánniń bir qudireti de sonda jatqan shyǵar dep paıymdaımyz. Kim bilsin, rasynda da solaı bolar...