Bilim kúni Qyzylorda qalasyndaǵy eki úlken mekteptiń janynan salynǵan qosymsha ǵımarattar paıdalanýǵa berildi.
Shetkerirek boı kótergen bilim oshaqtaryna qatynaý ata-anaǵa da, balaǵa da aıtarlyqtaı qıyndyq týǵyzady. Al bıýdjet qarjysyn únemdeıtin mundaı qosymsha ǵımarattar úsh aýysymmen oqıtyn mektepter aýlasyna salynyp otyr.
Irgeli bilim oshaǵy sanalatyn №101 mektep-lıseı aýlasynda salynǵan 375 oryndyq ǵımaratta bastaýysh synyptar oqıdy. Al úsh tilde oqytatyn daryndy balalarǵa arnalǵan Abaı atyndaǵy mektepke 550 oryndyq qosymsha ǵımarat salyndy.
Jańa ǵımarattarda oqý quraldaryn saqtaýǵa, balalardyń shyǵarmashylyq damýy men demalýyna tolyq jaǵdaı jasalǵan. Beınebaqylaý, dybystyq habarlaý jáne basqa da kúsheıtilgen qaýipsizdik jabdyqtary ornatylypty.
Oblys ortalyǵyndaǵy budan basqa taǵy eki mekteptiń qosymsha ǵımarattary jańa oqý jylynda balalardy qabyldady.
QYZYLORDA