Fýtzaldan álem chempıonatynyń irikteý kezeńine qatysyp jatqan Qazaqstan ulttyq quramasy toptyq saıystyń úshinshi oıynynda da jeńiske jetti. Bul joly Ázerbaıjanǵa sapar shekken Kaka shákirtteri jergilikti quramany óz jankúıerleriniń aldynda qapy qaldyrdy.
Álemdik dodaǵa joldama beretin irikteý saıystaryn úshinshi (negizgi) kezeńnen bastaǵan jerlesterimiz óz tobynda birinshi orynmen, sońǵy elıtaly raýndqa shyqty. Bul synda bizdiń jigitter Eýropa chempıonatynyń úsh dúrkin qatysýshysy (eki ret shırek fınalǵa deıin jetken) Rýmynııa, 1989 jylǵy álem chempıonatynyń kúmis júldegeri jáne 1999 jylǵy Eýropa birinshiliginiń tórtinshi oryn ıegeri Nıderland jáne 2016 jyly Kolýmbııada ótken álem chempıonatynyń qatysýshysy, keıingi bes jylda Eýropa birinshiligine turaqty qatysyp kele jatqan Ázerbaıjan quramalarymen bir topta synǵa túsip jatyr. Eýropa fýtzalynyń erejesi boıynsha, bes topta birinshi oryn alǵan quramalar О́zbekstandaǵy álem chempıonatyna tikeleı joldama alsa, ekinshi oryn alǵan eń úzdik tórt qurama qalǵan eki joldamany ózara sarapqa salady.
Qazaqstan ulttyq quramasy elıtaly kezeńdegi alǵashqy oıynyn syrt alańda Nıderlandpen ótkizip, 2:0 esebimen senimdi jeńiske jetse, bul týrda Rýmynııa óz alańynda Ázerbaıjan quramasynan 3:1 esebimen basym tústi. Al ekinshi kezeńde jerlesterimiz Almatyda Rýmynııamen ótken asa tartysty kezdesýde 4:3 esebimen jeńisti julyp alyp, óz tobynda kóshbasshyǵa aınaldy. Sol kúni Ázerbaıjan fýtzalshylary Nıderland quramasyn iri eseppen qapy qaldyrdy – 6:1.
Juma kúni ótken úshinshi týrda Rýmynııa óz alańynda Nıderland quramasymen kezdesse, jerlesterimiz syrt alańda Ázerbaıjanmen sheberlik baıqasty. Bakýdegi matchta Rıkardo Kaka shákirtteri birinshi mınýttan bastap dopty óz baqylaýynda ustap, alań ıelerine shabýylǵa shyǵýǵa múmkindik bermedi. Biraq alǵashqy kezeńniń bel ortasyna jetkende Ázerbaıjan quramasynyń oıynshylary eki márte qaýipti shabýyl jasap, Igıtaǵa eki ret seıv jasaýǵa týra keldi. Tynymsyz shabýylynyń nátıjesinde ázerbaıjandyqtar 12-mınýtta aqyry óz degenine jetti. Igıtanyń qaqpany bos qaldyryp, oıynǵa aralasyp ketkenin qarsylas fýtzalshylar tıimdi paıdalanyp, bos qalǵan qaqpany dál kózdedi. Kezeń sońyna deıin jerlesterimiz tarazy basyn teńestirýge tyrysqanymen, oǵan jergilikti oıynshylar múmkindik bermedi.
Úzilis kezeńinde Kaka bapkerden tıisti aqyl-keńesin tyńdap shyqqan jerlesterimizdiń ekinshi taımda oıyndary túrlenip shyǵa keldi. 23-mınýtta Dáýren Tursaǵulovtyń pasynan keıin Birjan Orazov esep aıyrmasyn qysqartsa, arada tórt mınýt ótkende Dýglastyń aýyttan tepken doby qarsylas oıynshysyna tıip, qaqpa tórinen tabyldy – 2:1.
Matchtyń aıaqtalýyna bes mınýt qalǵanda jeńilip jatqan Ázerbaıjan quramasynyń bas bapkeri alańǵa qaqpashynyń ornyna besinshi oıynshyny shyǵardy. Alań ıeleri kezekti aıyp dobyn oryndaý barysynda qatelikke boı aldyryp, dopty tartyp alǵan «Qaırat» oıynshysy Dáýren Tursaǵulov bos qalǵan qaqpaǵa úshinshi goldy soqsa, oıynnyń aıaqtalýyna bir mınýt qalǵanda Edson da bos qaqpany dál kózdedi. Al sońǵy sekýndtarda Maneka Ázerbaıjan quramasynyń ekinshi golyn soqty. Qorytyndy esep – 4:2.
Sóıtip, úsh týrda 9 upaı jınaǵan Qazaqstan quramasy óz tobynda jeke-dara kósh bastasa, Nıderlandty tize búktirgen Rýmynııa (2:1) 6 upaımen ekinshi orynǵa jaıǵasty. Úsh upaıy bar Ázerbaıjan úshinshi orynǵa turaqtasa, birde-bir upaıy joq Nıderland sońǵy orynda qalyp qoıdy. Kelesi týrda Qazaqstan quramasy Astanada Ázerbaıjandy qabyldaıdy. Bul oıyn 11 qazanǵa josparlanǵan. Match elordadaǵy Jaqsylyq Úshkempirov atyndaǵy jekpe-jek saraıynda ótedi. Al Nıderland pen Rýmynııa Amsterdamda oınaıdy.