Mektep ashanasynan shyqqan daý túgesiler emes. Birshama ýaqyt buryn Almaty oblysy Qarasaı aýdanyna qarasty bilim oshaqtarynyń birinde oqýshylarǵa merzimi ótip ketken ıogýrt berilgeni týraly aqparat taraǵan edi. Endi mine, Baızaq aýdanyndaǵy Nyǵmetýlla Kıikbaev atyndaǵy mektep-gımnazııasynyń ashanasyndaǵy tamaqtan 44 oqýshy, 2 ustaz ýlandy degen aqparat jeldeı esip tur.
Derekterge júginsek, aýdan ortalyǵy Sarykemer aýylyndaǵy mektep-gımnazııasynyń oqýshylarynyń boıyndaǵy álsizdik pen loqsý belgileri jetinshi qarasha kúni anyqtalǵan. Alǵashqy shaǵym da dál sol kúni tús aýǵanda tirkelgen. Jalpy sany 46 adam tún mezgiline deıin ótinish bildirip úlgergen.
Jurtty daýryqtyrǵan máselege qatysty oblys ákimdigi resmı habarlama taratty. Sondaı-aq óńir basshysy Erbol Qarashókeev Nyǵmetýlla Kıikbaev atyndaǵy mektep-gımnazııasyndaǵy shýdan keıin aýdandyq ortalyq aýrýhanaǵa arnaıy baryp, bilim alýshylar men ustazdardyń jaǵdaıymen tanysty.
Qazirgi kezde óńir basshysy Erbol Qarashókeevtiń tapsyrmasy negizinde arnaıy komıssııa qurylyp, jaǵdaıdy tolyqtaı baqylaýǵa alyp otyr. Bilim alýshylar men eresekter shynynda da ashanadaǵy astan ýlanǵan ba, álde basqa sebep bar ma? Bul másele aldaǵy ýaqytta tolyqtaı zerdelenbek.
Baızaq aýdanynyń ortalyq aýrýhanasyna jatqyzylǵan 35 adamnyń jaǵdaıy ortasha, turaqty. Naýqastarǵa barlyq qajetti medısınalyq kómekter kórsetilýde.
Bul másele boıynsha Jambyl oblysynyń ákimi Erbol Qarashókeevtiń tapsyrmasymen arnaıy komıssııa quryldy.
Sarykemer aýylyndaǵy N. Kıikbaev atyndaǵy mektep-gımnazııasynyń oqýshysynyń álsizdik, qusý boıynsha shaǵymdanǵan alǵashqy ótinishi 7 qarasha kúni tústen keıin tirkeldi.
Jambyl oblysy ákiminiń tapsyrmasyna sáıkes, respýblıkalyq mamandardan, anestezıologtardan, pedıatrlardan, toksıkologtardan jáne ınfeksıonısterden turatyn komıssııa quryldy.
Saǵat 23.00-ge deıin ótinish bildirgenderdiń jalpy sany 46 adamdy qurady (2 muǵalim, 44 bala).
46 adamnyń 33-i aýrýhanaǵa jatqyzyldy, jaǵdaılary ortasha, turaqty. Aýrýhanaǵa jatqyzylǵandarǵa detoksıkasııa terapııasy júrgizildi. Antıbıotıkalyq emdeýdi qajet etpeıtin 11 adam medısınalyq keńes alǵannan keıin ambýlatorııalyq emdeý jáne úıden baqylaý úshin qaıtaryldy.
Jalpy praktıka dárigerlerinen, pedıatrdan, ýchaskelik medbıkeden turatyn 16 mobıldi top 205 aýlany aralap, osy kúni oqý ornynyń ashanasyna kelgen qalǵan oqýshylardy tekserýden ótkizdi. Tekserý qorytyndysy boıynsha olardyń jaǵdaıy qanaǵattanarlyq jaǵdaıda, shaǵymdar men aýrý belgileri joq.
N.Kıikbaev atyndaǵy mektep-gımnazııasyn tamaqpen qamtýǵa jaýapty JK «Toqseıitovtiń» jumysy mán-jaılar naqtylanǵanǵa deıin toqtatyldy. Mektep oqshaýlanǵan, bakterıologııalyq zertteý sharalary júrgizilip jatyr», delingen oblys ákimdigi taratqan resmı habarlamada.
Aýdandyq ortalyq aýrýhananyń bas dárigeri Jandos Rysqulovtyń aıtýynsha, boıyn álsizdik bılegen azamattar áýelde bir-birden at basyn burǵan. Keıinnen aýrýhanaǵa qaıyrylýshylardyń qatary kúrt kóbeıgen. Qazirgi kezde shaǵymdanǵandardyń jaǵdaıy turaqty. Júrek aıný, loqsý, dene qyzýynyń kóterilýi sekildi belgiler joq. Sondaı-aq túngi úshke deıin júzdegen bala qaralypty. Olardyń da jaǵdaıy turaqty. Alańdaýǵa negiz joq.
Kıikbaev atyndaǵy mektep-gımnazııasy qazirgi kezde ýaqytsha jabyldy. Derekterge júginsek, bilim ordasyn aspen qamtamasyz etý qyzmetimen aınalysqan «Toqseıitov» ataýymen tirkelgen jeke kásipker aýdan boıynsha 13 mekemege azyq-túlik tasymaldaıtyn kórinedi.
Balalar men ustazdar rasymen de ashanadaǵy astan ýlandy ma? Kiná kásipker tarapynan ketti me, álde aspaz aǵattyq jiberip aldy ma? Bálkim basqa da bir jaǵdaı oryn alǵan bolar... Ázirge naqtysyn tap basyp aıtý qıyn. Eń bastysy osy oqıǵa boıynsha tekserý jumystary bastalyp ketti. Nátıjesi az kúnde belgili bolmaq.
Jambyl oblysy
Baızaq aýdany