Moıynqum aýdanynyń aýmaǵynda ornalasqan «Anabaı» gaz kesheni paıdalanýǵa berildi. Sý jańa ken ornyn «QazaqGaz barlaý jáne óndirý» JShS qajetti jabdyqtarmen tolyq qamtamasyz etken. Tıisinshe gaz uńǵymalaryn konservasııalaý boıynsha jumystar atqarylǵan.
«QazaqGaz barlaý jáne óndirý» JShS baspasóz qyzmeti taratqan derekke júginsek, seriktestik basshylyǵy joǵaryda aıtqan jumystan bólek, «Anabaı-Jarqum» gaz qubyryn salý jumysyn júzege asyrǵan. Qazirgi kezde jospardaǵy qurylys-montaj jumystary aıaqtalǵan. «QazaqGaz» basqarma tóraǵasy Sanjar Jarkeshovtiń sózinshe, «Anabaı» gaz keshenin iske qosý jumystary jol kartasy jobasy aıasynda qolǵa alynypty.
«QazaqGaz»-ǵa tıesili resýrstyq bazasyn arttyrý boıynsha naqty jumystar júzege asyrylyp jatyr. Kompanııanyń taýarlyq gaz kólemin ulǵaıtý boıynsha qabyldaǵan «jol kartasy» jobasy sheńberinde birneshe gaz kenishin, sondaı-aq «Anabaı» ken ornyn iske qosý kózdelgen bolatyn. «QazaqGaz» gazdyń ózindik resýrstyq bazasyn arttyrý úshin jer qoınaýyn geologııalyq zertteýge jáne jańa ýchaskelerdi geologııalyq barlaýǵa lısenzııa alý boıynsha tıisti jumystardy júrgizip jatyr», deıdi ol.
Seriktestiktiń alǵa qoıǵan jospary aıqyn. Derekke sensek, 2023 jyly gaz óndirý kólemin 6,5 mln tekshe metrge jetkizý kózdelgen bolsa, 2028 jyly 44 mln tekshe metrge jetkizýdi maqsat tutyp otyr. Jalpy alǵanda «Anabaı» ken ornynan alynatyn gaz kólemi ishki naryqtyń qajettiligin qamtamasyz etý maqsatynda paıdalanylady eken.
«QazaqGaz barlaý jáne óndirý» JShS bas dırektory Almas Qýandyqov keltirgen derekke júginsek, jańadan iske qosylǵan «Anabaı» ken ornynyń qory 4 mlrd tekshe metrdi quraıdy. Iri jobaǵa tartylǵan ınvestısııa kólemi 12 mlrd teńgege jetken. Aldaǵy ýaqytta ken ornyn odan ári burǵylaý jumystaryn qolǵa alýdy josparlap otyr.
«QazaqGaz «UK» AQ 2022 jyldyń qarasha aıynda «Amangeldi Gaz» JShS-ǵa transformasııalaý júrgizip, atqarylǵan jumystyń nátıjesinde uıym «QazaqGaz barlaý jáne óndirý» ataýymen qaıta qurylǵan edi.
Jambyl oblysy,
Moıynqum aýdany