Skandınavııa túbeginde gandboldan áıelder arasyndaǵy álem chempıonatynyń shymyldyǵy túrildi. Danııa, Norvegııa jáne Shvesııanyń birqatar shaharynda ótip jatqan jarysta 32 memlekettiń ókilderi óner kórsetip jatyr. Solardyń qatarynda Qazaqstannyń ulttyq quramasy da bar.
Sporttyń bul túrinen álem chempıonatynyń tusaýy 1957 jyly kesildi. Alǵashqy jarys Iýgoslavııada uıymdastyryldy. Bul báseke Chehoslovakııanyń jeńisimen aıaqtalsa, Majarstan kúmis medaldy ıelendi. Qola medal jarys qojaıyndaryna buıyrdy. 1957-2021 jyldar aralyǵynda tórtkúl dúnıeniń ár qıyrynan jınalǵan komandalar 25 ret bas qosty. Eń kóp oljaǵa kenelgen Norvegııanyń qol doby sheberleri. Skandınavııalyqtar 4 altyn, 4 kúmis jáne 3 qolany oljalady. Ekinshi oryndy – Reseı. Kórshilerimiz 4 altyn men 1 qolany qorjynǵa saldy. Úshinshi satyǵa KSRO jaıǵasty. Kelmeske ketken eldiń ókilderi 3 altyn, 2 kúmis jáne 1 qolany ıelendi. Sondaı-aq ár kezderi jeńis tuǵyryna kóterilgender qatarynda myna memleketterdiń gandbolshylary bar: GDR (3+0+1), Fransııa (2+4+0), Majarstan (1+4+4), Iýgoslavııa (1+3+3), Danııa (1+2+3), Rýmynııa (1+2+1), Nıderland pen Chehoslovakııa (1+1+1), Germanııa (1+0+2), Ońtústik Koreıa (1+0+1), Brazılııa (1+0+0), Ispanııa (0+1+1), Serbııa (0+1+0) jáne Aýstrııa men GFR (0+0+1). Barlyǵy osy 18 komandaǵa ǵana júlde alý baqyty buıyrǵan eken.
Qazaqstan quramasy álemdik dodada alty ret baq synady. 2007 jyly Fransııada jergilikti gandbolshylar (20:31) men Horvatııadan (25:35) utylyp, Argentınadan (26:22) aılamyzdy asyrdyq. Nátıjesinde, 24 komandanyń arasynan 18-orynǵa taban tiredik. 2009 jyly Qytaı elinde Ońtústik Koreıa (21:39), Qytaı (13:25), Kot-d’Ivýar (22:30), Japonııa (17:33), Týnıs (22:33) jáne Taılandtan (23:27) jeńilip, Argentına (28:24) men Chılıge (32:26) shań qaptyrdyq. Qorytyndy esepte 22-oryndy qanaǵat tuttyq. 2011 jyly Brazılııada Aýstralııa (37:9) men Ýrýgvaıǵa (31:22) álimiz jetti. Al Ońtústik Koreıa (19:31), Nıderland (20:32), Ispanııa (18:27), Reseı (19:34) jáne Germanııanyń (14:37) aldynda dármensizdik tanyttyq. Ońtústik Amerıkadaǵy dodada buıyrǵany – 19-oryn. 2015 jyly Danııadaǵy nátıjemiz odan da tómen boldy. Bul joly 22-orynǵa turaqtadyq. Toptyq týrnırde tegisteı utyldyq: Ispanııa (10:31), Rýmynııa (20:36), Norvegııa (19:40), Reseı (19:42) jáne Pýerto-Rıko (27:30). Odan keıin Kongony (31:30) qapy qaldyrǵanymyzben, Týnıske (23:39) jarytyp qarsylyq kórsete almadyq. 2019 jyly Japonııada dál sol mejeden kórindik. Kún shyǵys elinde qytaılardy ǵana 29:23 esebimen uttyq, qalǵan komandalar aldymyzdy orap ketti. 2021 jyly Ispanııadaǵy chempıonattyń alǵashqy kezeńinde norvegter men rýmyndarǵa jol berip, Irannan mereıimiz ústem boldy. Ekinshi kezeńde Shvesııa, Nıderland, Rýmynııa, Norvegııa jáne Pýerto-Rıko quramalaryna qarsy oıyndarda – 133 dop aıyrmashylyǵymen tas-talqanymyz shyqty. Nátıjesinde, 32 komanda arasynda 24-oryndy enshiledik.
Keıingi álem chempıonaty osydan eki jyl buryn Ispanııada uıymdastyryldy. Pıreneı túbeginde norvegııalyqtarǵa teń keler komanda tabylmady. Toptyq týrnırdegi bes oıynnyń tórteýin utyp, bireýin teń aıaqtaǵan olar birinshi oryndy ıelendi. Pleı-off saıystarynda Reseı (34:28), Ispanııa (27:21) jáne Fransııa (29:22) quramalaryn jolynan yǵystyryp, bas júldeni oljalady. Úshinshi oryn úshin tartysta danııalyqtar ıspandyqtardy (35:29) utty.
Bıylǵy álem chempıonatyn Danııanyń Hernıng qalasyndaǵy «Iıýske-bank-boksen» (12 500 kórermenge eseptelgen) men Frıdrıhshafendegi «Soltústik Arena» (2 800), Danııanyń Stavengerindegi «DNB Arena» (5 500) men Tronheımdegi «Tronheım Spektrým» (8 800) jáne Shvesııanyń Helsınbýrgindegi «Helsınbýrg Arena» (5 500) men Gıoteborgtaǵy «Skandınavıým» (12 000) sport keshenderi qabyldap jatyr.
Skandınavııada jalaýy jelbiregen jarysqa 32 komanda qatysyp jatqanyn aıttyq. Jerlesterimiz G tobyna tústi. Qarsylastarymyz – Ispanııa, Brazılııa jáne Ýkraına. Pıreneı túbeginiń burymdylary 2012 jyly London Olımpıadasynda qola medal alyp, 2011 jáne 2019 jyldardaǵy álem chempıonatynda júldegerler qatarynan kórindi.Eýropa chempıonattarynda (2018, 2014 jyldary) eki ret fınalda oınady. Brazılııa 2013 jyly ótken dúnıejúzilik dodada aldyna jan salmady. Ýkraına 2000 jylǵy álem chempıonatynda kúmispen kúptelse, 2004 jyly Afına Olımpıadasynda qolaǵa qol jetkizdi. Mine, bizdiń qyzdarǵa osyndaı myqty qarsylastarmen kúsh synasýǵa týra keledi. Jer-jahannyń myqtylary jınalǵan jarysta Qazaqstannyń qol doby sheberleri tabysty óner kórsete almaǵanymen, otandastarymyz Azııa chempıonatynda 2 altyn men 1 qola jáne Azııa oıyndarynda 2 kúmis pen 1 qolany ıelendi. Bálkim, osy joly eń bolmaǵanda jarys kestesiniń bel ortasyna jaqyndaı túsedi dep úmittenimiz. Atalǵan báseke 17 jeltoqsanda óz máresine jetedi.