Chelıabi memlekettik ýnıversıtetiniń Qostanaı fılıalynda Qazaqstan men Reseıdiń irgeles óńirleri arasyndaǵy yntymaqtastyq máselesine arnalǵan «Eýrazııa qaqpasy» halyqaralyq forýmy ótti. Jıynda qazirgi qoǵam betalysyndaǵy ózekti máseleler men eki el arasyndaǵy ıntegrasııalyq úderister talqyǵa tústi.
Forým jumysy «Sóz joly», «Nan joly», «Jibek joly», «Sý joly» dep atalǵan tórt baǵytta órbidi. Alǵashqysynda dástúrli BAQ pen jańa medıanyń jumysy, ekinshi seksııada Qostanaı jáne Chelıabi oblystaryndaǵy shyǵarmashylyq birlestikterdiń damýy, mýzeıler men galereıalardyń, kórme ortalyqtarynyń jaı-kúıi sóz boldy. Al «Nan joly» seksııasyna jınalǵandar túrli halyqtardyń tanymy men mádenıetinde nannyń alatyn orny, nan pisirýdiń dástúrli ádisteri talqylandy. Atalǵan seksııa jumysy aıasynda Qostanaı men Chelıabi naýbaıhanalarynda pisirilgen nan ónimderi kórmesi ashyldy. Jıynnyń «Jibek joly» atty bóliminde kásipkerler men salalyq mekemelerdiń ókilderi irgeles eki óńir arasyndaǵy ekonomıkalyq baılanysty nyǵaıtý, kásipkerlikti damytýda tájirıbe almasý máselesin talqylady. Sondaı-aq shalǵaı óńirlerdi tastap ketip jatqan halyqty qalaı toqtatýǵa bolady degen saýal tóńireginde pikir alysty. Mysaly, Chelıabi memlekettik ýnıversıtetiniń dosenti, ekonomıka ǵylymdarynyń kandıdaty Dmıtrıı Pletnev shet óńirlerden kóbine 20-24 jas aralyǵyndaǵy turǵyndar kóship jatqanyn aıtady.
«Negizinen jastar ketip jatyr. Máskeý nemese Sankt-Peterbýrg sekildi iri qalalarǵa bilim alýǵa nemese tabysy joǵary jumys izdep ketedi. Mundaı jaǵdaı Qazaqstanda da bar dep oılaımyn. Sondyqtan memleket jergilikti jastardyń bastamasyna barynsha qarjylaı qoldaý jasap otyrý kerek», dedi D.Pletnev.
«Sý joly» seksııasyna ekologter men ekologııalyq jaýapkershiligin arttyrý maqsatynda izdenis jasap jatqan kásiporyn basshylary jınaldy. Bul jerde ózen-kólderdi saqtaý, qorǵaý, saýyqtyrý, sý tazartý nysandaryn salý, ekologııa salasyna maman daıarlaý máseleleri kóterildi.
Forým aıasynda qazaq, orys, tatar, bashqurt halyqtarynyń folklorlyq ánderi shyrqaldy. Kórshiles eki óńirdi mekendegen halyqtardyń turmys-mádenıetinen syr shertetin kórme ashyldy. Kórmege qoıylǵan jádigerlerdiń ishinde tatar-bashqurt halqynyń aǵartýshysy, kezinde Troısk qalasynda medrese ustaǵan Zeınolla Rasýlovtyń taıaǵyn, HVIII-HIH ǵasyrlardan jetken ulttyq kıim úlgilerin kórýge bolady.
Qostanaı oblysy