Kóshede radıo sóılep tur
О́tken ǵasyrdyń 50-60-jyldary aýdan ortalyǵynda ǵana emes, keńshar, ujymshar, tipti ferma ortalyqtaryndaǵy kóshede sańqyldap radıo sóılep turatyn shaqtardy meniń zamandastarym umyta qoımaǵan shyǵar. Radıonyń kóshede sóılegeni turǵyndarǵa kóńildi áser qaldyratyn. Sol ýaqytta qazirgi kezdegideı ár adamnyń qolynda mobıldi telefon joq edi. Biraq erteńgi kúni aýa raıynyń qandaı bolatynyn kóshe radıosynan estip, bilip otyratyn. Malshy qaýymy qysta qatty boran nemese aıaz, jazda kúshti jel nemese nóser jańbyr bolatyn jaǵdaılardy da radıodan estip, erte qamdanatyn.
Jaqynda Tasqala aýylynyń kóshesinde sóılep turǵan jergilikti radıo habaryn estigende, ótken ǵasyrdyń orta shenindegi kóshe radıolary eriksiz eske tústi. Bala kezimiz. Taıpaq aýdanyndaǵy Oral qarakól qoı keńsharynyń №2 «Qyryq-qudyq» degen fermasynda turdyq. Ol kezde ortalyqtandyrylǵan elektr jelisi joq. Ár ferma ortalyqtarynda DT-54 traktorynyń motory arqyly elektr qýaty beriledi. Al aýylda shaǵyn elektr stansasy boldy. Qalekesh degen kisi sol shaǵyn elektr stansasyn keshke qosyp, tańerteń aǵytyp tastaıtyn. Kúndiz úılerde jaryq bolmaıtyn.
Qatty aıazdy nemese borandy kúnderi mektepte sabaq bolmaıtyny, aýylǵa ártister kelip, konsert qoıatyny, keńshar dırektory, partkom qaı kúni kelip aýyl turǵyndarymen jınalys, kezdesýler ótkizetini radıo arqyly habarlanyp turatyn.
Tasqala aýylynda kóshede radıo sóılep turǵanyn estigende, kóńiliń óz-ózinen kóterilip-aq qalady eken. Saǵymdanǵan balalyq shaǵyńa qaıta oralǵandaı bolasyń. Tek qaı ýaqytta sóılep, qaı ýaqytta sóndiretin jumys kestesin anyqtasa eken degen tilek aıtar edim. Radıodan el jańalyqtaryn, túrli habarlardy kóshede kele jatyp-aq estısiń. Aýylda kóshe radıosy sańqyldap sóıleı bergeı. Turǵyndar muny jańa istiń jaqsy bastamasy dep qabyldap otyr.
Bısenbaı О́TEGENOV,
zeınetker
Batys Qazaqstan oblysy,
Tasqala aýdany
Kóńilden shyqqan izgi is-shara
Úlken izgi is-shara «Júrek jylýy» degen atpen Jambyl oblysynyń Talas aýdanyndaǵy Aqkól aýylynda ótkizildi. №6 Talas aýdandyq arnaýly áleýmettik qyzmetter usyný ortalyǵynyń uıymdastyrýymen ótken is-sharaǵa meniń Marat Kókishev atty ulym da qatysty. Ol densaýlyǵyna baılanysty sol mekemede arnaıy áleýmettik qyzmet alady. Atalǵan basqosýǵa shaqyrtý alǵan soń, biz de baryp tamashalaǵan edik.
Is-sharaǵa kelgen ata-analardy qýana qushaq jaıa qarsy alyp, jyly sózderin aıamaǵan mekeme qyzmetkerlerin kórip, kóńilimiz ornyna tústi. Osy zamanǵa laıyqty medısınalyq apparattardyń kóptigin kórip te rıza boldyq. Jalpy, ortalyqqa kelgen ata-analarǵa osyndaǵy bólmelerdiń jaryqtyǵy, tazalyǵy, jylylyǵy, mekeme qyzmetkerleri men áleýmettik jumys jónindegi mamandardyń elgezektigi, qyzmet alýshylardy qabilet-qarymyna qaraı eńbekke úıretýleri de jaǵymdy áser qaldyrdy. Sóz retinde mekeme dırektory Jalyn Rahymjanuly ekenin de aıta ketkendi jón kórdik.
Maǵan qyzmet alýshylardyń túrli aýtotrenıngterge júreksinbeı qatysatyndary da unady. Al kesh barysynda qyzmet alýshylarmen qatar, ata-analar da qatysqan oıyndarǵa mekeme dırektorynyń ózi de atsalysty. Sonymen birge eńbekke baýlıtyn oıyndar da óte áserli ári mazmundy boldy. Jasy úlken, kishisine qaramaı, qyzmet alýshylar men qyzmetkerlerdiń qonaqtarǵa arnap qoıǵan konserti de kóńil tolqytty. Qyzmet alýshylardyń ishinde de ónerli jastar bar eken.
Qysqasy, aýqymdy is-sharadan alǵan áserimiz mol boldy. Onyń ústine, balalarymyzdyń senimdi qolda ekendikterine kóńilderimiz toǵaıyp qaıtty, ıaǵnı №6 Talas aýdandyq arnaýly áleýmettik qyzmetter usyný ortalyǵynyń qyzmet alýshylarǵa jasap jatqan izgi isterine tek rızashylyǵymyzdy bildirgimiz keledi.
Álıma JUMABAEVA,
ata-analar uıymynyń múshesi
Jambyl oblysy,
Qarataý qalasy
Bolashaq urpaqtyń sáýletshisi
Kitaphana jumysy – kózge kórine bermeıtin aǵysy baıaý tereń ózen sekildi, túsingen adamǵa jaýapty jumys. Kitaphanashy – jaı ǵana mamandyq emes. Ol – adam balasyna baǵdar berýshi. Eger de qoǵamǵa beıim, bilim nárimen tereń sýsyndaǵan, tárbıeli de izgi júrekti jastar aldaryna úlken maqsattar qoıyp jatsa, munda kitaphanashylardyń da eńbegi bar. О́ıtkeni olar – bolashaq urpaqtyń sáýletshisi.
Búgin elimizde kitaphana isi boıynsha birneshe oqý ornynda mamandar daıarlanady. Solardyń biregeıi – Ál-Farabı atyndaǵy Qazaq ulttyq ýnıversıteti. Bilim men tárbıeni qatar ushtastyra bilgen, bolashaqqa nyq qadam basatyn daryndy, izdenimpaz jastardyń qara shańyraǵynda «Kitaphanalyq aqparattyq júıeler» salasy boıynsha 2023-2024 oqý jylynda 22 bakalavr, 8 magıstrant, 6 ǵylym jolyn kózdegen PhD doktorant daıyndap shyǵarylady. Oqytý qazaq, orys jáne aǵylshyn tilderinde júrgiziledi. Oqý túrleri men merzimi: orta bilimnen keıin kúndizgi bólimde bakalavrıat – 4 jyl, magıstrant – 2 jyl, doktorant 3 jyl bilimin jetildiredi. Munda tek otandyq oqytýshylar ǵana emes, shetel ýnıversıtetteri ǵalymdary da dáris beredi.
Ýnıversıtettiń basty maqsaty – elimizdiń ǵylymyna, ekonomıkasy men basqa da mańyzdy salalaryna qajetti zamanaýı, joǵary bilimdi, tárbıeli, básekege qabiletti myqty mamandar býynyn qalyptastyrý. «El bolamyn deseń, besigińdi túze» degen qaǵıda – ýnıversıtettiń negizgi ustanymy.
Bolashaqta elimizdegi kitaphana salasynyń damýyna óz úlesin qosyp, osy mamandyqtyń qyr-syryn tereńnen meńgeretin, Qazaqstannyń básekege qabiletti elderdiń qataryna qosylýyna óz úlesterin qosýǵa umtylatyn jastardy ýnıversıtettiń túlegi bolýǵa shaqyramyz.
Baıan ASANOVA,
tarıh ǵylymdarynyń kandıdaty, aǵa oqytýshy,
Ulpan JAPSARBAI,
«Kitaphanalyq aqparattyq júıeler»
mamandyǵynyń 2-kýrs magıstranty
ALMATY