El ishinde elik júr

Áýeli áleýmettik jelide jarııalanǵan beınebaıan­­nan kórgenbiz. Jaqsy aýlynan shyqqan jolaý­shy túsiripti. Atbasarǵa taıa­ǵanda joldyń qos qap­ta­lynda júzdegen elik josyp júr. Qarasy sondaı kóp. Árıne, Kókshetaý da­lasy eliksiz emes, buryn da bolǵan, qazir de bar. Biraq dál mundaı úıir-úıi­rimen josyp júrgenin esh­kim kózine iliktirgen joq shyǵar. Taza aýaǵa tábetiń aýyp, orman-toǵaıdy aralaı qalsań, birli-jarymy janaryńa iligetin. Ádemi, tuńǵıyq kózderimen jasqana qarap, ıt tumsyǵy ótpeıtin qalyń ormannyń qoınaýyna sińip keter edi. Bul jolǵysy, tipti, ǵalamat. Astyǵy jınalyp alynǵan alqapta, aǵash baýrynda josyp júr. Qara joldyń boıynda tynym­­syz aǵylyp jatqan kólikten ­de seskenip, boı tasalamaıdy. Munshalyqty kóp elik qaıdan keldi eken? Ań ja­ıyn bilemin deıtinderdiń aıtýyna qaraǵanda, irge­degi Sibirden aýǵan syńaı­ly. Osy pikir qısynǵa kele­di. Dál qazir ıen dalada elik­tiń aýzyna ilige qoıatyn azyq ta joq. Sabandy sheteldik kombaındar ýaqtap úgip, shashyp tastaǵan. Dalanyń er­ke ańy bylaı tursyn, jyl­qy jaryqtyqtyń da nesibesi azaıǵan.

Aq qar jamylyp, tomaǵa-tuıyq kúı keshken jalpaq jonda jan baǵatyn yryz­dyq tappady ma eken, elik baıǵus el ishine enip ketti. Aldymen Kókshetaý qala­sy men Zerendi jaq bettegi saıajaılardyń ishinen kózge ilikken. Kelesi kúni qala­­nyń qaq ortasyndaǵy dema­lys parkiniń mańynan ta­byl­­dy. Qopa kólin jaǵalaı si­res­ken muz ústinde áldene­­sheýi júr. Qalaı bolǵan kúnde ­de taǵy emes pe, úrkedi, árı­ne. Aýyl-aýyldyń ishine kir­gen elik ataýly ıtke jem bol­masyna kim kepil? Ta­bı­ǵatqa, onyń tól balasy elikke jany ashıtyn aǵa­ıyn shóp shashyp, jem tók­se eken deısiń de. Sóıtip, qolyndaǵy barymen bólis­se, túz ta­ǵysy týlaqtaı tozbaı, tuıa­ǵyn saqtap qalar ma edi, kim bilsin? «Bir qysqa qoıan terisi de shydaıdy» degendeı, eliktiń erkeli­gin kóterýge eldiń eldigi de je­tip qalar. Shybyn janyn saqtaımyn dep shyryldap aýyl aralaǵan kerbez kes­kindi, jaýtańdaǵan janarly jan ıesiniń obalyn ar­qalaǵanda ne tabamyz? Qandy aýyzyn qamdaǵan ashkózderge el­degi aqsaqal táıt dep tyıym salsa, tamasha bolar edi.

Kókshetaý