Tekeli taýlarynyń baýraıynda «Uly dala dúbiri: saıatshylar saıysy» ulttyq oıyny ótti. V dúnıejúzilik kóshpeliler dodasy aıasynda qolǵa alǵan mádenı is-shara rýhymyzdy asqaqtatty. Saıatshylyqty serik etken seriler dala tósin dúbirge bólep, qus ushyryp, tazy júgirtti.
Memleket basshysy Qasym-Jomart Toqaev «Egemen Qazaqstan» gazetine bergen suhbatynda: «Dúnıejúzilik kóshpeliler oıynyn ótkizý de elimiz úshin aıtýly oqıǵa bolmaq. Baıraqty báseke ulttyq sport pen salamatty ómir saltyn dáripteý jaǵynan da, Uly daladaǵy kóshpeliler órkenıetiniń murageri sanalatyn baýyrlas halyqtardyń mádenı-gýmanıtarlyq baılanysyn arttyrý turǵysynan da mańyzdy ekeni sózsiz» degen edi. Osy maqsatta Jetisý tórinde baıyrǵy baba dástúri qaıta jańǵyrdy.
Kópke aıan, bıyl Astanada etnıkalyq sport túrlerinen ótetin dúnıejúzilik kóshpeliler oıyndaryna júzden astam memleketten 4 myńǵa jýyq sportshy qatyspaq. Onda at sporty, ulttyq kúres túrleri, sadaq atý, jamby atý, dástúrli ıntellektýaldy oıyndar, saıatshylyq óner, arqan tartý syndy oıynnyń 20 túrinen jarys uıymdastyrylady.
«Saıatshylyq ónerdiń sán-saltanaty, delebeni qozdyratyn ózgeshe qasıetimen birge tylsym qupııasy da jeterlik. Soǵan qumartyp, saıatshylar saıysyn tamashalaýǵa jınalǵan kópshiliktiń kóńil kúıi shalqyp-tasyp, babynda turǵan júırik at, qumaı tazy, qyran qustar kóz qýantady. Arnaıy kórme uıymdastyrylyp, er-toqym, júgen, noqta, aıyl, kuıysqan, ómildirik, qamshy sekildi at ábzelderi men tomaǵa, tuǵyr, balaqbaý, irgebaý, bııalaı sekildi qus ábzelderi nazarǵa usynyldy. Bul – ǵajap dúnıe», deıdi oblystyq «Jetisý saıatshylary» ulttyq sport túrleri federasııasynyń prezıdenti Búrkitbaı Faızolla.
Saıys basynda Tekeli qalalyq Ardagerler keńesiniń tóraǵasy Ertaı Dúısebaev bata berip, qatysýshylarǵa sáttilik tiledi. Sondaı-aq osy ıgilikti iske uıytqy bolǵan jandarǵa alǵys aıtty.
Qyran qustyń tilin tapqan qusbegiler qalalyq saıysqa 6 búrkit ákelipti. Olar qolǵa shaqyrý, shyrǵa tartý, qoıan jáne túlkige salý kezeńderinde qyraǵylyǵy men babyn kórsetti. Saıys qorytyndysynda Erke atty búrkitimen Ázen Sháımardanuly top jardy. Odan keıin Aqjelke atty búrkitimen Túseı Ábdikárimuly oza shapty. Al úshinshi oryndy Aıqabaq atty búrkitimen Jasulan Búrkitbaıuly ıelendi.
Qumaı tazylar jarysynda Tekeli qalasy jáne irgeles jatqan Syrymbet, Jetisý aýyldarynan 14 tazy baq synady. Qadyrhan Ádilbekovtiń «Ushary» jeńimpaz atansa, ekinshi oryndy Beksultan Naýhanovtyń «Qyrany» qanjyǵalady. Úshinshi tuǵyrdan Kerilbek Baıannyń «Aqtósi» kórindi.
Saıys sońynda qala ákimi Almas Ádil men qalalyq máslıhat tóraǵasy Baýyrjan Tuǵylbaev júldegerlerin quttyqtap, arnaıy dıplom men aqshalaı syı-sııapat tabys etti.
Jetisý oblysy