Japonııa memleketiniń «Shóp tamyry» jobasynyń sharapatyn kórgen otandyq medısınalyq nysandar az emes. Qaıtarymsyz grantty elimizdiń ár qıyryndaǵy aýrýhanalar jyldar boıy alyp júr. Joba aıasyndaǵy áriptestik Jambyl jerinde de jalǵasyn tapty.
Qaıtarymsyz grantty Talas aýdandyq ortalyq aýrýhanasynyń ujymy jeńip aldy. Oblys ortalyǵynan 100 shaqyrym qashyqtyqta jatqan aýdandyq aýrýhana qyzmetkerleri de endi jumysyn «Shóp tamyry» jobasy aıasynda úılestirmek.
Kúnshyǵys eliniń Qazaqstandaǵy Tótenshe jáne ókiletti elshisi Iаmada Djýn, arnaıy ókil Komııa Shımon jáne «Shóp tamyry» adam qaýipsizdigin qamtamasyz etý boıynsha áleýmettik jobalarǵa arnalǵan qaıtarymsyz kómek baǵdarlamasynyń úılestirýshileri Ikenoýe Iýtaro men Álııa Shyńǵyspaeva bastaǵan arnaıy top Qarataı qalasyna arnaıy kelip, jergilikti mamandarǵa jobanyń mańyzdylyǵyn túsindirdi.
Úılestirýshiler keltirgen derekke sensek, «Shóp tamyry» jobasy 27 jyldan beri úzdiksiz qyzmet atqaryp jatyr. Basty maqsaty – úkimettik emes uıymdar men medısınalyq jáne bilim mekemelerine qoldaý kórsetý arqyly halyqtyń az qamtylǵan sanatynyń ómir súrý sapasyn jaqsartý.
«Rasynda da, «Shóp tamyry» – adam qaýipsizdigin qamtamasyz etý boıynsha áleýmettik jobalarǵa arnalǵan qaıtarymsyz kómek baǵdarlamasy. Joba sheńberinde medısına ortalyqtarǵa, ekologııalyq aımaqtarǵa, oqý oryndaryna, múmkindigi shekteýli jandarǵa, balalar úıine qoldan kelgenshe kómek kórsetilip jatyr. Endi, mine, joba aıasynda Talas aýdandyq jáne oblystyq kópbeıindi aýrýhanaǵa alynǵan turmystyq-tehnıkalyq jabdyqtar paıdalanýǵa berilip otyr. Sondaı-aq bul jolǵy erekshelik – medısınalyq qaldyqtardy qaýipsiz joıýǵa arnalǵan peshtiń ornatylýy», deıdi mártebeli meımandar jaǵdaıdy túsindirip.
Is-shara barysynda Japonııadan arnaıy kelgen mamandar emdeý mekemesine medısınalyq qaldyqtardy kádege jaratýǵa arnalǵan «Vesta plıýs» ınsınerator peshin jáne tońazytqysh pen kir jýý mashınalaryn ornatty. Bul jumys tehnıkalyq jaraqtandyrý jónindegi joba aıasynda júzege asyrylyp otyr.
Oblys ákimdigi densaýlyq saqtaý basqarmasynyń basshysy Janar Ospanovanyń aıtýynsha, úzdiksiz jumys atqaryp kele jatqan joba úılestirýshileriniń Jambyl oblysyndaǵy aýdanǵa nazar aýdarǵany – quptarlyq is. Jergilikti mamandarmen kezdesý barysynda kúnshyǵys elinen kelgen qonaqtar medısına qyzmetkerlerin tolǵandyrǵan túrli suraqqa naqty jaýap berdi. Sondaı-aq olar aýdandyq aýrýhana men emhanany aralap, emdeý uıymynyń áleýetimen tanysty.
Jambyl oblysy,
Talas aýdany