Qaıta túrlengen «Birjan – Sara»

Sahnaǵa «Birjan – Sara» operasynyń shyǵýy óner súıer qaýym úshin ǵana emes, «Astana Opera» ártisteri úshin de aıtýly oqıǵa. Birin-biri unatqan qos aqyn Birjan men Saranyń hıkaıa­sy qazir de ózektiligin joǵaltqan joq. Sondyqtan bolsa kerek, ulttyq klassıkamyzdyń uly ta­qyryby opera teatrlary reper­týarynda zor mańyzǵa ıe. Ýaqyt­pen birge jańaryp, jasaryp kele jatqan jaýharymyzdyń bul sahnalanýynda da jańalyq kóp. Biz tamashalaǵan qoıylymda keıip­kerlerdiń beınesi jańasha qurylyp, qazaq klassıkasy basqa qyrynan berildi. Operada qol­danylǵan 3D-tehnologııa, ıtalııa­lyq maman Serdjıo Metal­lıdiń beıneproeksııalary shyn máninde ulttyq jaýharymyzdyń shyraıy­n ashqan sátti sheshimder bolǵany anyq.

Qazaq operasynyń zor jetis­tigine aınalǵan spektaklde «As­tana Operanyń» talantty so­lısteri sahnaǵa shyqty. Birjan partııasyn Qazaqstannyń eńbek sińir­gen qaıratkeri Meıir Baı­nesh pen Beıimbet Tańaryqov oryn­dady, al Saranyń rólin Qa­zaq­stannyń eńbek sińirgen qaı­ratkerleri Bıbigúl Januzaq pen Aıgúl Nııazova somdady. Eki kesh boıy elordalyqtardy erekshe áserge bólegen qoıylymda sonymen qatar teatrdyń «jasarǵan» jańa quramy debıýtterimen tánti etti. Atap aıtsaq, qalyń kó­rermen Altynaı beınesinde al­ǵash shyqqan Ulpan Áýbákirova ónerin zor qoshemetpen qarsy aldy. «Daryn» memlekettik jas­tar syılyǵynyń laýreaty Altynbek Ábilda (Jıenqul), Vale­rıı Selıvanov (Qojaǵul), Me­reı Qadyrhanov (Serik) ta osy ope­radaǵy partııalardy tuńǵysh ret oryndady.

– Birjanǵa bala kezden ǵashyq Altynaı Sarany ózine baqtalas kórip, qyzǵanyshtan qııanatqa bas tigedi. Jaýapsyz mahabbat qyzdy kór soqyr etip, onyń júregine zu­lymdyq uıalatady. Altynaı ope­rada jaǵymsyz keıipker retin­de kórsetilse de, men úshin ol meıi­rimdi qyz, tek Birjandy ózine qa­rata almaǵandyqtan ashýǵa boı aldyrady. Osy jaýapsyz mahabbaty ony teris amaldar jasaýǵa ıtermeleıdi. Sezim sergeldeńiniń sońy qaıǵyly jaǵdaıǵa ulasady. Altynaı qansha jerden qatygez kóringenimen, men keıipkerimniń áre­ketin barynsha aqtap alý­ǵa, jaqsy qasıetterin basa kórse­týge tyrystym, degen Ulpan Áý­­bákirova pikirin áriptesi, Bir­jannyń ákesi Qojaǵuldyń par­tııasynda shyqqan teatr ártisi Va­le­rıı Selıvanov: – Qojaǵul kishigirim ról bolǵanymen, men úshin mańyzdy debıýt bolǵany anyq. Keıipkerim ulyna árdaıym qamqor bolyp, ony ýaıymdap júredi. Sebebi moldalar oǵan bılikpen qaqtyǵys bolý qaýpin eskertedi. Al ákesimen sa­lys­tyrǵanda bul jaǵdaıǵa Birjan beı­qam. Osy rólim arqyly áke men bala arasyndaǵy qarym-qa­tynasty barynsha jan-jaqty jet­kizýge tyrystym, deıdi solıst.

Al Jıenquldyń partııa­synda debıýt jasaǵan teatr so­lısi Altynbek Ábildanyń aıtýynsha, bul ról – onyń ulttyq repertýardaǵy jaǵymsyz keıip­kerdi ekinshi ret oryndaýy. Buǵan deıin ánshi A.Jubanov pen L.Hamıdıdiń «Abaı» opera­syndaǵy Jırenshe bıdiń rólinde sahnaǵa shyqqan.

– Jıenqul aqyn Sarany ózine kúshtep tórtinshi áıel qy­lyp alǵysy keledi. Jaǵymsyz keıipker bolǵandyqtan beınemen kóp jumys isteýime týra keldi. Ró­limniń vokaldyq-tehnıkalyq jaǵynan dıapazony óte keń. Tó­mengi notalar kóp kezdesedi. Son­dyqtan dybystardyń estilýine mán berip, mýzykalyq frazalarmen tyńǵylyqty jumys istedim. Sebebi bul beıneniń bolmysyn shynaıy ashý úshin daýysty dybystardy anyq aıtý óte mańyzdy, – dedi ártis.

Muqan Tólebaevtyń «Birjan – Sara» operasyna eki jyldan keıin seksen jyl tolady. 2013 jyly «Astana Opera» teatry ult­tyq klassıkanyń altyn qoryndaǵy dál osy jaýhar­men ashylǵan bolatyn. Birneshe jyl spektakl Reseıdiń Halyq ártisi, Qazaqstannyń Mem­lekettik syılyǵynyń laý­reaty Iýrıı Aleksandrovtyń qoıy­lymynda júrip keldi. Aıtýly týyn­dy 2014 jyly Sankt-Pe­ter­býrg qalasyndaǵy ataqty Ma­rııa teatrynyń sahnasynda kór­setilip, kórermenniń zor qoshe­metine ıe boldy. Al 2018 jyly elordalyq teatr «Birjan – Sara» operasyn Qazaqstannyń eń­bek sińir­gen qaıratkeri Ashat Mae­mı­rov pen keńesshi rejısser Mı­haıl Pandjavıdzeniń zamanaýı kózqarasta saraptalǵan jańa mýzykalyq-sahnalyq redaksııasymen kórermen nazaryna usyndy. Eki qoıylymnyń da qoıýshy dırıjeri retinde Qazaqstannyń eńbek sińir­gen qaı­ratkeri, mýzykalyq redak­­sııalardyń avtory Abzal Muhıt­dın ter tókti. Jańashyl kózqarasta usynylǵan ulttyq qoıylym kórer­men qurmetine bólendi.