Senat tóraǵasy Máýlen Áshimbaev Azııadaǵy ózara is-qımyl jáne senim sharalary jónindegi keńestiń Bas hatshysy Qaırat Sarybaımen kezdesti, dep habarlaıdy Egemen.kz Senattyń baspasóz qyzmetine silteme jasap.
Máýlen Áshimbaev Bas hatshyǵa iltıpat bildirip, búginde AО́SShK-niń róli artyp kele jatqanyn jáne ózara yntymaqtastyqty odan ári nyǵaıtýǵa múddeli ekenin atap ótti. Sondaı-aq Palata Spıkeri Keńestiń Astanada ótken VI sammıtinde aıtylǵan bastamalarǵa nazar aýdaryp, ony tolyqqandy halyqaralyq uıymǵa aınaldyrýdy kózdeıtin Jol kartasyn iske asyrý tetikterine toqtaldy.
«2022 jyly Astanada ótken Sammıt kezinde Memleket basshysy Qasym-Jomart Kemeluly Toqaev Qazaqstannyń 2022-2024 jyldary Uıymǵa tóraǵalyǵy kezeńine arnalǵan basymdyqtardy aıqyndap berdi. Olardyń qatarynda Eriktiler qozǵalystary kóshbasshylarynyń sletin ótkizý, Múshe memleketterdiń jetekshi ýnıversıtetteriniń áriptestik jelisin qurý, Ekologııa máseleleri boıynsha joǵary deńgeıli konferensııa uıymdastyrý, Ornyqty ózara baılanys jónindegi keńes qurý sııaqty bastamalar bar. Senat Keńesti ınstıtýsıonaldy turǵydan damytýǵa arnalǵan mindetterdi iske asyrýǵa zańnamalyq qoldaý kórsetýge daıyn», degen Máýlen Áshimbaev qazirgi tańda Palatanyń turaqty komıtetteri men Uıym arasynda tyǵyz baılanys qalyptasqanyn tilge tıek etti.
Kezdesý barysynda taraptar Qazaqstannyń AО́SShK-ge tóraǵalyǵyna qatysty máselelerdi talqylady. Odan bólek, jyldan jylǵa Uıymnyń geografııasy men qyzmet aıasynyń keńeıip kele jatqany aıtyldy. Naqty aıtqanda, epıdemıologııalyq qaýipsizdik, densaýlyq saqtaý, farmasevtıka, aqparattyq jáne kommýnıkasııalyq tehnologııalar qaýipsizdigi sııaqty yntymaqtastyqtyń jańa basym baǵyttary engizildi.
Sonymen qatar kezdesýde órkenıetter men dinder arasyndaǵy dıalogty damytý máselesi keńinen sóz boldy. Osyǵan oraı Máýlen Áshimbaev Álemdik jáne dástúrli dinder kóshbasshylarynyń sezin damytýdyń 2033 jylǵa deıingi Tujyrymdamasy jóninde aıtyp, aldaǵy ýaqyttaǵy birlesken jumystyń baǵyt-baǵdaryna nazar aýdardy.
«Qazaqstannyń bastamasymen qurylǵan Álemdik jáne dástúrli dinder kóshbasshylarynyń sezine ótken jyly 20 jyl toldy. Byltyrǵy qazan aıynda Astanada Sezdi damytýdyń aldaǵy 10 jylǵa arnalǵan tujyrymdamasyn qabyldadyq. Bul rette Sezd Hatshylyǵy dinaralyq jáne órkenıetaralyq dıalogty odan ári nyǵaıtý úshin halyqaralyq uıymdarmen yntymaqtastyqty arttyrýǵa múddeli. Biz Uıymnyń senim sharalary katalogynda órkenıetter, mádenıetter jáne dinder arasyndaǵy dıalogty damytýǵa basa mán berilgenin bilemiz. Osy baǵytta birlesip jumys isteýge bolady dep esepteımin», dedi Máýlen Áshimbaev.
Sondaı-aq Senat tóraǵasy Memleket basshysynyń bastamasymen elimizde júrgizilip jatqan reformalardy iske asyrý aıasynda Palata atqaryp otyrǵan zańnamalyq jumystar jóninde aıtty.