Endi azamattar óz balalarynyń bolashaǵy úshin bilim berý jınaqtaý salymyn asha alady. Mundaı múmkindikti «Otbasy bank» usynyp otyr. «AQYL» dep atalatyn depozıttiń maqsaty – azamattarymyzdyń óz bilimine nemese balalarynyń bilimine qarajat jınaýyna múmkindik jasaý. Onyń kómegimen qazaqstandyq nemese sheteldik bilim berý mekemesinde oqý aqysyn tóleýge bolady.
«AQYL» bilim berý jınaqtaý salymyn keminde 3 jyl nemese 5 jyl merzimge ashýǵa bolady. Eger depozıt keminde úsh jyl merzimge ashylsa, onda depozıt boıynsha mólsherleme jyldyq 12%-ǵa (jyldyq tıimdi syıaqy mólsherlemesi – JTSM 13,1%-ǵa deıin) teń bolady. Eger depozıt keminde 5 jyl merzimge ashylsa, onda depozıt boıynsha mólsherleme 9,5%-ǵa (JTSM 10,1%-ǵa deıin) teń bolady. Banktiń eseptelgen syıaqysy aı saıyn kapıtaldandyrylyp otyrady. Depozıt merzimi aıaqtalǵannan keıin ol avtomatty túrde jańartylady.
«Bank jumysynyń alǵashqy saǵattarynan-aq 50-den astam qazaqstandyq depozıt ashyp úlgerdi. «AQYL» – ata-analarǵa balalarynyń oqýyna qarajat jınaýǵa kómektesetin erekshe qural. Shynymen de, bala dúnıege kelisimen ár otbasy urpaǵynyń qandaı bilim alatynyn, ulyn nemese qyzyn sheteldik joǵary oqý ornynda nemese qazaqstandyq ınstıtýtta oqytatynyn oılaıdy. Eger bala grantqa tússe, onda «AQYL» depozıtindegi qarjyny alyp, olardy kez kelgen ózge maqsatqa, sonyń ishinde turǵyn úı satyp alýǵa jumsaýǵa bolady», deıdi «Otbasy bank» basqarma tóraǵasy Lázzat Ibragımova.
Depozıtke jyl saıyn esepteletin syılyqaqy salymshylardyń barlyq sanaty úshin 5%-dy quraıdy. Jetim balalarǵa, ata-anasynyń qamqorlyǵynsyz qalǵan balalarǵa, múmkindigi shekteýli balalarǵa, kópbalaly otbasylardan shyqqan jáne jan basyna shaqqandaǵy tabysy az, ıaǵnı azyq-túlik sebetinen tómen otbasylarǵa ashylǵan depozıtterge memlekettik syılyqaqy 7% mólsherinde esepteledi. Jyl saıyn depozıtke esepteletin syılyqaqynyń eń joǵary mólsheri 100 aılyq eseptik kórsetkishten (2024 jylǵa – 369 200 teńge) aspaýǵa tıis.
Memlekettik syılyqaqyny esepteý úshin salym bir jylǵa tolýǵa tıis. Depozıt ashylǵan kezde mindetti túrde jasalatyn bastapqy jarnanyń mólsheri úsh aılyq eseptik kórsetkishke nemese 11 076 teńgege (2024 jyly) teń bolýy kerek. Bolashaqta depozıttiń aı saıynǵy aýdarymdar mólsherin salymshy óz múmkindigine qaraı anyqtaıdy.
Aıta keteıik, depozıt memleket pen úshinshi tulǵalardyń óndirip alýynan qorǵalǵan, sondaı-aq ol Qazaqstandyq depozıtterge kepildik berý qorynda saqtandyrylǵan. Grant alǵan kezde jınaqtaýshy depozıtti jabýǵa jáne memlekettik syılyqaqyny qosa alǵanda, jınaqtaýdyń barlyq somasyn alýǵa bolady. Sonymen qatar bul depozıtti Ulttyq qordan alynǵan jınaqtarmen de tolyqtyrý múmkindigi bar. Bul tólemderdi bıyl 18 jasqa tolǵan qazaqstandyqtar qoldana alady. Ony «Ulttyq qor – balalarǵa» jobasy aıasynda enpf-otbasy.kz platformasy arqyly júzege asyrýǵa bolady.