Ulystyń uly kúni qarsańyndaǵy «Shańyraq kúni» oblys ortalyǵy men ár aýdanda atalyp ótti. Osy kúni jastardyń neke qııý saltanaty ótkizilip, kópke syıly aqsaqaldar bata berdi. Bas qosqandaryna jarty ǵasyr bolǵan otbasylar úshin «Altyn shańyraq», 25 jyl otasqandar arasynda «Kúmis kerege» baıqaýlary uıymdastyrylyp, jeńimpazdarǵa baǵaly syılyqtar tabystaldy. Dúnıe esigin ashqan sábılerdiń anasyna «Naýryz-bazarlyq» estelik syılyqtary berildi.
«Shańyraq kúni» aıasynda Jalaǵashta aýdan ákiminiń orynbasary Ǵanı Súleımenov, aýdandyq qoǵamdyq damý bóliminiń basshysy Jasulan Espenbet pen aýdandyq analar keńesiniń tóraıymy Aıqyn Jaqsylyqova perzenthanaǵa baryp, osy kúni dúnıege atustar ákelgen Farıda Álıeva men Perızat Ahmetovaǵa, kestetigerdiń anasy Nurgúl Musabaevaǵa syı-sııapat tabystap, gúl shoqtaryn usyndy.
Qazalylyqtar da osy ataýly kúndi aıryqsha atap ótti. R.Baǵlanova atyndaǵy mádenıet ortalyǵynda is-shara uıymdastyrylyp, jarty ǵasyr jup jazbaǵan Jetkergenovter otbasy men otasqandaryna 25 jyl bolǵan Muqanovtar shańyraǵyna qurmet kórsetildi. Aýdanaralyq aýrýhananyń bas dárigeri Baqytkúl Álisheva jas bosanǵan analarǵa syı tabystady.
Aral qalasyndaǵy Otbasyn qoldaý ortalyǵynda kelin túsirip, jańa otaý kótergen jastardyń neke qııý rásimderi ótkizildi. Dástúrge saı betashar ótip, otbasy qundylyqtary dáripteldi. Saltanatty túrde jastardyń nekesi qıylyp, jas otaý ıelerine kýálik pen syı-sııapat tabystaldy. Aýdanǵa belgili mádenıet salasynyń ardageri, qazyna qarııa Baınııaz Tilepov jas jubaılarǵa bata berip, elimizge baq-bereke tiledi.
Syrdarııada osy kúni ul bosanǵan Gúljan Qulmaǵambetovany aýdandyq aýrýhana bas dárigeriniń orynbasary Aqkúl Kúleke men aýrýhana qyzmetkerleriniń kásipodaq uıymy tóraǵasy Serik Mahanbetov quttyqtady.
Ataýly kúni Jańaqorǵanda aýdan ákiminiń orynbasary Bektas Nurıddınov pen aýdandyq aýrýhana bas dárigeri Táńirbergen Ámıtuly dúnıege kelgen 3 sábıdiń anasyn «Shańyraq kúnimen» quttyqtap, qurmet kórsetti.
Osy kúni Qyzylorda qalasyndaǵy Otbasy ortalyǵynda otbasylyq tanymdyq is-shara uıymdastyrylyp, bereke-birligi jarasqan shańyraqtar kópshilikke nasıhattaldy.
Qyzylorda oblysy