Kúnniń kúrt jylynýynan Aqtóbe oblysyndaǵy dalalyq ózender – Embi, Jem, Saǵyz, Temir, Yrǵyz, Qaýyljyr ózenderindegi sý deńgeıi kóterilip, birneshe eldi mekenge sý basý qaýpi tóndi.
26 naýryzda Oıyl aýdanynyń Amangeldi, Shubarshı, Saraljyn aýyldarynyń shetine kirgen qarǵyn sýdyń beti qaıtaryldy. Osy kúni Yrǵyz ózeni Sheńbertal eldi mekeniniń ótkeline kelip tirelip, joldy sý basty, aýyl qatynassyz qaldy. Baıǵanın aýdanynyń Oımaýyt, Mııaly, Dııar eldi mekenderine baratyn avtokólik jolyn birneshe jerden sý shaıyp, aýdan ortalyǵy – Qaraýylkeldidegi S.Báıishev, Baraq batyr kósheleri boıyndaǵy turǵyn úılerge sý kirdi. Qaraýylkeldige kirgen qarǵyn sýdyń betin qaıtarýǵa TJD, polısııa departamenti, jergilikti atqarýshy organ qyzmetkerleri jumyldyrylyp, olar sý basý qaýpi bar úılerdiń janyna qum tasyp, jaıylǵan sýdyń shetin ınertti materıaldarmen toltyrdy. Muǵaljar aýdany «Qojasaı – Jańajol» baǵytyndaǵy jergilikti mańyzy bar joldyń 4 shaqyrymyn sý shaıyp ketip, Qojasaı men Jańajol aýyldary qatynassyz qaldy. Qazir bul jerden jeńil kólikter óte almaı, qańtarylyp tur. Temir aýdany ortalyǵy Shubarqudyq kentiniń bes turǵyn úıine jáne 25 úıdiń aýlasyna sý kirdi. Bul jaqtaǵy jaǵdaıdy retteýge TJD, polısııa departamenti, Tótenshe jaǵdaılar mınıstrliginiń Aqtóbe qalasyndaǵy №20282 áskerı bóliminiń kýrsanttary jumyldyryldy. 26 naýryz kúni «Pokrovka – Temir – Keńqııaq – Embi» (115-175) jáne «Jańajol – Qotyrtas» oblystyq mańyzy bar avtojoldar ýchaskesinde júk kólikteriniń qozǵalysyna shekteý qoıyldy. О́ıtkeni Jem jáne Qaýyljyr ózenderiniń ekpindi sýy jol boıyndaǵy kópirlerdi buzyp ketýi ábden yqtımal degen qaýip zor.
Oblystyq TJD bas mamany Álisher Sarbaevtyń habarlaýynsha, 26 naýryzda respýblıkalyq mańyzy bar «Qandyaǵash – Embi – Shalqar – Yrǵyz» tasjolynyń 288 shaqyrymyn, oblystyq mańyzy bar «Qaraýylkeldi – Altaı batyr – Mııaly» avtokólik jolynyń 63 shaqyrymyn jáne Áıteke bı aýdany Qaıraqty aýyldyq okrýgi Taldyq aýylynyń kireberis jolyn sý shaıyp ketti. Aqtóbe oblysyndaǵy sý tasqynyna kómekke Mańǵystaý oblysynan 52 adamnan turatyn qutqarý jasaǵy bes tehnıkasymen keldi. Temir ózeni Jańajol gaz óńdeýshi zaýytyna jaqyn ornalasqan. Sarkól, Shubarshı eldi mekenderine de qarǵyn sý kirip kelýi múmkin. Seısenbi kúni Aqtóbege TJM vıse-mnıstri Erlan Nurpeıisov kelip, birden Temir aýdanyna jol tartty.
Erigen qar sýymen tolyqqan dalalyq ózender arnasynyń kúrt kóterilýi aýyl jurtyn ábigerge saldy. Aıta ketý kerek, Muǵaljar qyrattarynan bastaý alatyn bulaqtarmen jalǵasqan Elek, Oıyl, Jem, Saǵyz, Temir, Or, Yrǵyz, Embi ózenderindegi sýdyń tasýy ádette sáýirdiń alǵashqy onkúndiginde ótetin. Bul joly keýip ketken ózen arnalarynyń kúrt kóterilýine dalalyqta jerge sińbeı erigen qardyń sýy sebep bolǵan. Al qazir sý basyp jatqan aýyl úıleri erterekte kóktemde sý jaıylatyn jerlerge salynǵan. Jaqyn kúnderi dalalyq ózender deńgeıi áli de kóterilýi múmkin.
Aqtóbe oblysy