Senattyń Áleýmettik-mádenı damý jáne ǵylym komıtetiniń depýtattary «Otandyq ǵylymdy damytý jáne ǵylymı-tehnıkalyq progress» taqyrybyna arnalǵan dóńgelek ústelge daıyndyq aıasynda ǵylymı-tehnıkalyq qyzmet nátıjeleriniń jumysymen tanysý maqsatynda L.Gýmılev atyndaǵy Eýrazııa ulttyq ýnıversıtetinde boldy, dep habarlaıdy Egemen.kz joǵarǵy Palatanyń baspasóz qyzmetine silteme jasap.
Senatorlarǵa atalǵan ýnıversıtette atom jáne sýtegi energetıkasy, molekýlalyq bıologııa, gen ınjenerııasy, bıomedısına jáne taǵy basqa salalarda 240-tan astam ǵylymı zertteýler men halyqaralyq 10 ǵylymı joba iske asyp jatqany týraly habardar etildi. Al 13 fakýltette jáne 31 ǵylymı-zertteý ortalyǵynda ǵylymı qyzmet júrgizilip keledi.
Parlamentshiler joǵary oqý orny bazasynda qurylǵan qurylys, jol-qurylys sektory qyzmetteriniń tolyq tizbegin kórsetý jónindegi Qurylys-tehnıkalyq ınjınırıng ortalyǵynyń zerthanasynda boldy. Atalǵan ortalyq qurylys salasyna qajetti ozyq tehnologııalardy ázirleýmen aınalysady.
Senat depýtattary is-shara barysynda basshylyqpen jáne professor-oqytýshylar quramymen ǵylymı qyzmetti damytý máselelerin, problemalardy, sondaı-aq olardy sheshý joldaryn talqylady. Parlamentshiler sapar qorytyndysy boıynsha kezdesý aıasynda kóterilgen ózekti máselelerdi nazarǵa alyp, olardyń aldaǵy dóńgelek ústel otyrysynda talqylaýǵa shyǵarylatynyn atap ótti.