Dál qazir «Astana operada» 11-12 sáýir kúnderi ótetin G.Donısettıdiń «Qońyraý nemese Dárihanashynyń neke túni» operasynyń premerasyna qyzý daıyndyq júrip jatyr. Shymyldyqtyń ar jaǵynda sózben aıtyp jetkizgisiz shyǵarmashylyq tolqynys pen ǵajaıyp atmosfera ornaǵan.
Aıtýly óner oqıǵasy qarsańynda «Astana operaǵa» arnaıy baryp, teatr tynysymen tanysyp qaıtqan edik. Qyzý qarbalas ortasynda júrgen Astana Opera Halyqaralyq akademııasynyń tyńdaýshylary, qoıýshy dırıjer, qoıýshy rejısser men sýretshiler atalǵan premeranyń daıyndyq jumystary men izdenisteri týraly aıtyp berdi.
Aldymen bas suqqanymyz – tigin sehi boldy. Munda kostıým tigý isiniń sheberleri qoıýshy rejısser Nıkolaı Kýlıkovtyń oıyn júzege asyrý úshin talmaı eńbek etip jatyr. О́tkir qaıshynyń damylsyz qaıshylanýy men tigin mashınasynyń mata ústindegi úzdiksiz júrisiniń nátıjesinde ártisterdiń ústine ásem kıimder áp sátte qona qaldy: – Kostıýmder arqyly kóne kóshe teatrlarynyń tynys-tirshiligin beıneleýge bolady. Ol kezde teatrlyq kıimder qarama-qarsy túster men reńkterde jasalatyn, al ártisterdiń betterinde appaq grım bolatyn. Kostıýmderdi tigý kezinde jakkard, zerli jáne kostıým matasy kóbirek qoldanyldy. Ázil-syqaq ústeý úshin keıbir keıipkerlerdiń beıneleri shamaly ásirelengen. Jalpy, kostıým jasaý tujyrymdamasy tarıhı pishýdi zamanaýı kıim elementterimen biriktirýdi maqsat etedi, – dep jumys barysyn kostıýmder boıynsha sýretshi Darıǵa Taıshyqova baıandap berdi.
Al qoıýshy dırıjer Rýslan Baımýrzın orkestr ártisteri men akademııa tyńdaýshylaryn mańaıyna uıystyryp, G.Donısettıdiń mýzykasyn oryndaý erekshelikteri boıynsha jumys istep, daıyndyqtardy muqııat júrgizip jatyr. О́ner ıesin kompozıtordyń partıtýraǵa salǵan emosıonaldyq mazmunyn jetkizýge tyrysyp, mýzykanttarǵa týyndy tabıǵatyn baryn salyp túsindirip jatqan jerinen jolyqtyrdyq. Dırıjer trýppa izdenisi týraly keńinen áńgimelep berdi.
– Bul – Donısettıdiń «Astana opera» afıshasyndaǵy osymen úshinshi operasy. «Qońyraý nemese Dárihanashynyń neke túnin» biz Piccolo teatry jobasy aıasynda Astana Opera Halyqaralyq opera akademııasynyń solısterimen birge oryndaımyz. G.Donısettıdiń basqa da shyǵarmalarymen qatar «Qońyraý» da opera teatrlarynyń sahnasynda jıi qoıylady. Mýzykasy óte ásem, biraq sonymen birge oryndaýshylar úshin aıtarlyqtaı kúrdeli, óıtkeni kompozıtordyń stılıstıkasy minsiz vokaldyq tehnıka men ıtalııa tilin jaqsy bilýdi talap etedi. Sebebi operada rechıtatıvter óte kóp. Jalpy, Donısettı – tamasha dramatýrg qoı, sondyqtan aıtýly qoıylymnyń oqıǵa jelisi kórermenin birden eliktirip áketedi. Bul premera kópshilik qyzyǵýshylyǵyn oıatqan sátti jumys bolady degen oıdamyn, – deıdi Rýslan Baımýrzın.
Ártister de dırıjer sózin qýattap, spektakldiń úlken yntany talap etetinin basa aıtty. Komedııalyq opera bolǵandyqtan shyǵarmashylyq jumys barysy álbette qyzyqty ótip jatyr. Daıyndyqta akademıster kóp ázildesip, sýyryp salý ónerlerin pash etti. Álbette, olar sahnada jarqyn, qyzyqty keıipkerlerdi somdaı alatyndaryna jáne alǵash ret elordada qart dárihanashy men jas jubaıynyń hıkaıasyn aıtatyndaryna qatty qýanyshty.
– «Qońyraý» operasyndaǵy dárihanashynyń partııasy – eń basty partııa. Barlyq is-áreket bas keıipkerdiń aınalasynda órbıdi. Árıne, mýzykalyq oryndaý jaǵynan da, akterlik oıyn turǵysynan da bul róldiń ózindik qıyndyqtary da bar. Komedııalyq keıipker Don Annıbale qıyn jaǵdaıda qalady. Jas qyzǵa úılengisi kelgenimen, qalyńdyǵynyń ǵashyǵy buǵan kóndige almaı, shym-shytyryq oqıǵa bastalyp ketedi. Partııa opera-býffa dástúrlerine saı jazylǵandyqtan óte qyzyqty. Biraq eń qıyny – keıipkerdiń barlyq komedııalyq harakterin kórermenge joǵary deńgeıde shynaıy jetkizý, – dep atap ótti Valerıı Selıvanov. Ártistiń sahnadaǵy juby, Serafınanyń beınesin somdaýǵa daıyndalyp jatqan Fırýza Rahmetova da áriptesimen bir pikirde:
– Meniń jattap jatqan partııam kóńildi bolýymen qatar, óziniń kóp qyrlylyǵymen kúrdeli jáne ol akterlik oıyndy aıtpaǵanda, emosııalar men mindetterdiń úlken shoǵyryn qamtıdy. Onda dýet, terset jáne rechıtatıvter bar. Men komedııalyq operalardy qatty jaqsy kóremin. Bul ról – meniń opera-býffany oryndaýdaǵy debıýtim. Sondyqtan da aıtýly partııaǵa asqan qyzyǵýshylyqpen, tebirenispen jáne jaýapkershilikpen qaraımyn. Spektaklge daıyndyq qarqyndy júrip jatyr, oǵan akademııanyń barlyq tyńdaýshysy jumyldyrylǵan. Biz kóne kóshe teatry formatyn óz paıymdaýymyzda tanystyrǵymyz keledi. Kóńildi kesh ótkizip, Astana Opera Halyqaralyq opera akademııasy tyńdaýshylarynyń oryndaýynan umytylmas áser alý úshin kórermender «Qońyraý» operasyna qýana keledi dep oılaımyn, – dep Fırýza Rahmetova sózin qorytyndylady.
«Qońyraý nemese Dárihanashynyń neke túni» atty qaıtalanbas komedııalyq operanyń premerasy 11-12 sáýir kúnderi «Astana Opera» teatrynyń K.Baıseıitova atyndaǵy kameralyq zalynda kórermenin kútedi.