Aral aýdandyq bilim bólimi mamandary Qazalydaǵy temirjol beketinen Batys Qazaqstan oblysynan kelgen 103 balany qarsy alyp, «Qambash» balalardy saýyqtyrý ortalyǵyna ornalastyrdy.
Aýdandyq bilim bóliminiń basshysy Sanıra Jannazarovanyń aıtýynsha, sý tasqynynan zardap shekken óńirden kelgen 5-9 synyp oqýshylary 10 kún boıy ortalyqta bilim alyp, demalady. Olardy aýdannyń tarıhı mádenı oryndarymen tanystyrý da josparlanyp otyr. Oqýshylardy 10 jetekshi, 1 medbıke bastap kelipti.
«Bul Oqý-aǵartý mınıstrliginiń jobasy aıasynda júzege asyp, jergilikti kásipkerler demeýshilik tanytyp otyr. Balalar úshin barlyq jaǵdaı jasaldy. Kúnine 5 mezgil tamaqtanady. On kúnde oqýmen qatar olardyń bos ýaqytynda túrli sporttyq, shyǵarmashylyq is-sharalar uıymdastyrylady», deıdi bilim bóliminiń basshysy.
Saýyqtyrý ortalyǵy oqýshylarǵa birden unapty. Olarǵa aýdan mektepterinen arnaıy daıyndalǵan muǵalimder sabaq beredi. Al baǵany «kúndelik.kz» platformasyna balalarmen birge kelgen jetekshileri qoıady.
Qyzylorda