Qazirgi ýaqytta Qazaqstannyń dári-dármek naryǵynda otandyq óndirýshilerdiń úlesi bar bolǵany 10 paıyzdy quraıdy. Tipti bul kórsetkishten de tómendep barady. Sondaı-aq otandyq dári-dármektiń jartysy ǵana halyqaralyq standarttarǵa sáıkes keledi. Kóńil kónshitpeıtin mundaı statıstıkany búgin Senat Tóraǵasy Máýlen Áshimbaev Palata otyrysynda aıtty, dep habarlaıdy Egemen.kz joǵarǵy Palatanyń baspasóz qyzmetine silteme jasap.
Palata Spıkeri atap ótkendeı, Memleket basshysy Qasym-Jomart Toqaev taıaý jyldarda farmasevtıka naryǵyndaǵy otandyq ónimniń úlesin 50 paıyzǵa jetkizý mindetin júktedi. Dúnıejúzilik densaýlyq saqtaý uıymynyń standarttaryna sáıkes, dári-dármek qaýipsizdigin qamtamasyz etý úshin naryqtaǵy otandyq ónimniń úlesi 30 paıyzdan kem bolmaýy kerek. El Prezıdenti otandyq farmasevtıka salasynda ónim aınalymyn ulǵaıtýdy tapsyrǵanymen, olardyń sany jyl saıyn azaıyp otyr.
«Esepterge qarasaq, bári keremet. Biraq naqty faktilerge mán berýimiz kerek. Resmı statıstıkaǵa súıensek, búginde bizdiń dári-dármek naryǵyndaǵy otandyq óndirýshilerdiń úlesi 10 paıyzdy ǵana quraıdy. Iаǵnı, kem degende 30 paıyzǵa jetý úshin áli de kóp jumys isteý kerek. Sondaı-aq elimizde negizgi farmasevtıkalyq ónimder men dári-dármek óndirisi 2022 jylmen salystyrǵanda byltyr 10 paıyzǵa tómendegen. Byltyr elimizde óndirilgen dári-dármektiń eksporty 28,5 paıyz, ıaǵnı shamamen 30 paıyzǵa azaıǵan. Al, ımport 3 paıyzǵa ósti. Mundaı jaǵdaımen biz Memleket basshysynyń farmasevtıkalyq naryqtaǵy otandyq ónimniń úlesin 50 paıyzǵa jetkizý týraly tapsyrmasyn qalaı oryndaımyz?», dedi Máýlen Áshimbaev.
Sonymen qatar Senat Tóraǵasy otandyq farmasevtıkalyq ónimderdiń teń jartysy DDU-nyń sapa standarttaryna saı kelmeıtinine nazar aýdardy. Osyǵan baılanysty Máýlen Áshimbaev Densaýlyq saqtaý mınıstrligi teorııadan praktıkaǵa kóbirek mán berýge jáne múddeli memlekettik organdardy, onyń ishinde О́nerkásip mınıstrligin, ulttyq kompanııalardy jáne sarapshylardy tarta otyryp, Senatta ózekti máselelerdi jan-jaqty talqylaýǵa shaqyrdy.
«Elimizdegi 43 otandyq dári-dármek óndirýshiniń tek 25-i ǵana GMP standarttaryna sáıkes keledi (eskertý, good manufacturing practice –medısınalyq jáne veterınarııalyq maqsattaǵy preparattardyń óndirisin jáne sapasyn baqylaýdy uıymdastyrý talaptaryn belgileıtin tıisti óndiristik tájirıbe nemese erejeler). Bul – Dúnıejúzilik densaýlyq saqtaý uıymy qoldanatyn jáne usynǵan standart. Iаǵnı, otandyq óndirýshilerdiń jartysy osy standarttarǵa saı kelmese, demek, bizdiń dári-dármektiń sapasy ımporttyq analogtarmen salystyrǵanda básekege qabiletsiz degen sóz. Kólemdi ulǵaıtý jáne sapany qamtamasyz etý jaǵynan da problemalar bar», degen Máýlen Áshimbaev Senattyń tıisti Komıtetterine osy taqyrypta keńeıtilgen otyrys nemese Úkimet saǵatyn ótkizýdi tapsyrdy.
Eske salaıyq, búgin Palata otyrysynda senatorlar birneshe zańdy, onyń ishinde Zııatkerlik menshik quqyǵynyń saýda aspektileri týraly kelisimge ózgerister engizý týraly hattamany ratıfıkasııalaýdy qarap, maquldady.