Atyraý oblysynda bala janyna tereń úńilip, bilim nárin seýip júrgen ustazdar az emes. Sondaı pedagogtiń qatarynda Tatıana Lıýbına da bar. Ol ý-shýy mol úlken shaharda emes, Inder aýdanyndaǵy Kóktoǵaı aýlynda kindik qany tamyp, qazaq balalarymen birge oınap ósken. О́zge etnos ókili bolǵanymen, qazaqty eshqashan jatsynǵan emes. О́ziniń ana tilimen birge qazaq tilin de jetik meńgergen.
«Qazir Atyraý qalasynda turǵanymmen, týǵan aýlymdy eshbir shaharǵa aıyrbastaı almaımyn. Kún saıyn «Aınalaıyn» dep emirenip turatyn úlkenderdi, birge oınaǵan, birge oqyǵan zamandastarymdy, qyzyǵy umytylmaıtyn bala kezimdi áli de saǵynyp júremin. Aýlymyzdaǵy kitaphanada qazaq jazýshylarynyń shyǵarmalaryn, ertegilerdi oqyp, mazmunyn dostaryma aıtyp berýshi edim», deıdi Tatıana Lıýbına.
Aýyl mektebin bitirgennen keıin Gýrev pedagogıkalyq ınstıtýtynyń fılologııa fakýltetinen joǵary bilim aldy. Jas maman 1984 jyly týǵan aýlyna oralyp, balalarǵa orys tili men ádebıetinen dáris bere bastady. Biraq aýyl balalarynyń deni orysshany túsine bermeıtini daýsyz. Sol sebepten Tatıana Nesterovnaǵa qazaq tiliniń grammatıkasyn meńgerýge týra keldi. Sóıtip, oqýshylarǵa sabaqty túsindirý úshin eki tildiń salystyrmaly grammatıkasyn qoldandy.
О́zi oqyǵan mektebinde úsh jyl jumys istep, 1987 jyly Atyraý qalasyna qonys aýdardy. Alaıda mundaǵy bilim ordalarynan orys tili men ádebıeti páninen oryn tabylmady. О́ıtkeni muǵalimderge saǵat jetispegen. «Al mende qazaq tili men ádebıetinen dáris beretindeı arnaıy dıplomym joq edi. Soǵan qaramastan mektep dırektorynyń biri qazaq tili páninen dáris berýdi usyndy. Árıne, bul men úshin úlken synaq boldy», deıdi Tatıana Nesterovna.
Osylaısha, ol aldymen qazaq tilinen emtıhan tapsyryp, grammatıka men orfografııany óte jaqsy meńgergenin kórsetti. Sóıtip, №14 mektepte orys synyptaryna qazaq tilinen sabaq bere bastady. Keıin M.Áýezov atyndaǵy Ońtústik Qazaqstan ýnıversıtetinen qazaq tili men ádebıeti pániniń muǵalimi dıplomyn aldy. Keıingi 30 jyldan beri №3 orta mektep-gımnazııada jumys isteıdi.
«Bala kúngi dostarymnyń bári qazaq edi. Bárimiz bir-birimizge qonaqqa barýshy edik. Bir-birimizden ulttyq taǵamdardy ázirleýdi úırendik. Qazir qazaq tilin ana tilimdeı qurmet tutamyn. Shákirtterimniń de qazaq halqynyń tilin, salt-dástúrin, tarıhyn bilgenin qalaımyn. Biraq búgingi balalar kórkem ádebıetti az oqıdy. Daıyn esseni ınternetten kóshirip alýǵa beıim turady. Sondyqtan til baılyǵyn damytýǵa mán bermeıdi», deıdi bilikti ustaz.
Ony qazaq tilin nasıhattaýshy ári janashyry deýge tolyq negiz bar. О́ıtkeni ol orys synybynda oqıtyn oqýshylardy qazaq tilin meńgerýge, qazaqsha esse jazýǵa baýlyp keledi. Esse – oqýshylardyń oı-órisin damytatyn utymdy tásil.
«Jumysym ózime unaıdy. Balalardy jaqsy kóremin. Mektep – meniń ekinshi úıim. Árıne, ustaz bolý jeńil kásip emes. Biraq oqýshylarǵa bilim nárin sepkennen artyq qýanysh bola ma? Oqýshylarym tek qazaqsha sóılep qana qoımaı, Abaı men Muqaǵalı sekildi qazaq aqyndarynyń jyryn túpnusqadan oqýyna qyzyǵýshylyǵyn oıatýǵa tyrysamyn», deıdi ol.
Ekinshi dúnıejúzilik soǵysqa qatysqan ákesi Nester men anasy Anna da qazaqpen baýyrdaı syılasyp, 13 balasyna ónegeli tárbıe bergen. Olar balalaryna «Jahanda qazaqtaı baýyrmal, kóńili darqan halyq joq. Qazaqty udaıy qurmettep júrińder», dep otyrady eken. Ata-ananyń aıtqanyn eki etpeıtin bul áýlettiń eki uly men úsh qyzy qazaqtan ómirlik serigin tapqan. Tatıananyń ózi Qýanyshqalı esimdi qazaq jigitine turmysqa shyqqan.
«Qazaqtyń otbasyna 24 jasymda kelin bolyp tústim. Ata-enem kelin dep emes, óz qyzyndaı baýyryna tartty. Olarmen aýylda birge turdyq. Sol kezde enem quraq kórpe tigýdi, oıý oıýdy úıretti. Enemmen birge aıran, shubat ashytyp, súzbe men qurt jasaıtyn edik. Birge jún tútip, urshyq ıirip otyratynbyz», dep ótken kúnderdi eske aldy.
Qyzy koreı jigitine turmysqa shyqqan. Biraq jıenderine qazaqsha esim birgen. Qudalary osyndaı uıǵarym jasaǵan eken. «Bul – qudalardyń tańdaýy. Muny qıyn kezde qoldaý kórsetken qazaq halqyna qurmettiń belgisi retinde qabyldadyq. Al ulym Arman Tarazda boı jetken qazaq qyzymen otbasyn qurdy. Kelinim ıbaly, kún saıyn sálemin salady. Shúkir, nemerelerimiz ósip keledi. Enemnen úırengen ulttyq salt-dástúrdiń otbasymyzda berik saqtalýyna uıytqy bolyp otyrmyn», deıdi T.Lıýbına.
Qazaq otbasynyń berekesin tasytyp, qazaq tiliniń janashyryna aınalǵan Tatıana Nesterovna elordada ótken Qazaqstan halqy Assambleıasynyń HHHIII sessııasyna qatysty. Prezıdenttiń Jarlyǵymen «Eren eńbegi úshin» medalimen marapattaldy. Bul – mamandyq pen jar tańdaýda qatelespegen qazaqtyń kelinine berilgen laıyqty marapat.
Atyraý oblysy