Qonaev qalasynyń aýmaǵynda shomylýǵa ruqsat berilgen 97 aımaq bar. Byltyr mıllıonnan asa demalýshy kelgen. Bıyl osy mejeden asý josparlanyp otyr. Qalanyń keshendi damý josparynyń aıasynda Qapshaǵaı sý qoımasynyń 5 shaqyrymnan asa jaǵajaıy abattandyrylady. Byltyr bekitilgen qalanyń Bas josparyna sáıkes jaǵalaýlardyń barlyǵy biryńǵaı dızaın kodqa saı abattandyrylyp, jańartylýǵa tıis.
Jalpy, shahar aýmaǵynda 140 týrızm nysany ornalasqan. Investısııalyq qarjyǵa boı kóteretin demalys oryndarynyń sany – 6. Onyń bireýi bıyl qoldanysqa beriledi dep josparlanǵan, ekeýi qurylys jumystarynyń birinshi kezeńin aıaqtap, byltyrdan beri qyzmet etip keledi. Al basqa ǵımarattar josparǵa saı jóndeýden ótip jatyr.
Qalalyq jaǵajaıda 40-tan asa kásipker jumys isteıdi. Jaýapty mekeme dárethanalar, 20 qoqys jáshigin ornatady. Kásipkerler de óz aýmaǵynda ájethana men jýynatyn oryn qoıýy qajet. Sondaı-aq munda aqparattyq bannerler ilinip, sý kóligi turaǵy jasalady, belgilengen aýmaqta ǵana júzý úshin sýǵa plastık zattar (býı) qoıylady. Jazǵy maýsymda qaýipsizdikti saqtaý maqsatynda 50 qutqarýshy, 7 júzý quraly jumyldyrylady.
Qaladaǵy týrızm salasynyń damýyna aýqymdy is-sharalar ótkizý dástúrge aınalǵan. Mysaly, ótken jyly «Oceanman», «Rok festıvali», «Rock family fast» is-sharasy ótkeni el esinde. Qalalyq jaǵajaıdyń mańyndaǵy parkte sportty damytý maqsatynda «Krossfıt alańyn abattandyrý» jobasy iske asyrylyp jatyr. Jalpy alańy – 1,470 gektar. Joba boıynsha shaǵyn fýtbol, basketbol, vorkaýt alańdary ornatylady.
Sonymen qatar 5-jaǵajaıda da qurylys jumysy júrip jatyr. Munda halyqtyń demalýyna barlyq jaǵdaı jasalady. Iаǵnı kıim aýystyratyn oryn, dárethanalar, qoqys jáshigi jobada qarastyrylǵan. Atalǵandardan bólek, bul jerde adamdardy kúnniń kózinen saqtanýyna shatyrlar qoıylǵan. Qutqarýshylar otyratyn jer de bar. Fotoaımaq, pırs ta salynyp jatyr. Jobanyń aıaqtalý merzimi – shildeniń sońy. Búginde qurylys jumysynyń 95 paıyzy aıaqtalǵan. Sport alańy da qarastyrylǵan.
Qazirgi tańda 8-jaǵajaıdy abattandyrý jobasyna túzetýler engizilip jatyr. Merdiger kompanııa – «Golden City DS» JShS. Bul jaǵajaıdyń aýmaǵy 72 myń sharshy metrden asady. Munda bıznes oryndary, ákimshilik, medısınalyq nysan, qutqarý beketteri, polısııa bólimshesi, ájethanalar men jýynýǵa arnalǵan oryn, veloturaq, sheshinýge arnalǵan oryn, shatyrlar ornatylady. Sonymen qatar jaǵajaıda órt qaýipsizdigin saqtaý úshin arnaıy rezervýarlar qoıylady.
Qurylys-montaj jumysy jeke ınvestısııa men bıýdjet qarjysyna júrgiziledi. Bıyl jaǵajaılardy tolyq abattandyrý úshin jobalyq-smetalyq qujat daıyndaý josparlanǵan. Qazirgi tańda «Freedom bank»-tiń ınvestısııalyq qarjysyna 1 shaqyrym jaǵajaı abattandyrylyp jatyr.
«Shomylý maýsymyna daıyndyq bastalǵanymen, áli de qıraǵan shatyrlar men tapshandar kóp. Bul týrısterdiń ómirine qaýipti. Birinshiden, osy máseleni sheshý maqsatynda, ekinshiden, biregeı sáýlettik kelbet jasap, demalýshylardy tartý maqsatynda joba ázirledik», dep TÚKSh bóliminiń basshysy Darhan Qaraǵonysov 5-jaǵajaıdy mysalǵa keltirdi. Onda sportpen aınalysýǵa, demalýǵa, oıyn oınaýǵa, kúnnen qorǵanýǵa, shomylýǵa bar jaǵdaı qarastyrylǵan.
«42 kásipkerge «Qonaev» ÁKK arqyly 2,5 paıyzben jeńildetilgen nesıe alyp, bıznes oryndaryn ózderi salýǵa múmkindik berip otyrmyz. Bıylǵy kelisimshart 3 jylǵa deıin uzartylady. Ákimdik tarapynan jol jasaý, abattandyrý sııaqty jumys isteledi. Jylyna 1 mln-nan asa týrıst keletinin eskersek, bul – eki tarapqa da ońtaıly sheshim. Kelispegen jaǵdaıda kelisimshart buzylyp, nysan ınvestısııalyq qarjyǵa salynady», dedi bólim basshysy.
Almaty oblysy