Oblystyq tarıhı-ólketaný mýzeıinde ár dáýir mádenıetinen syr shertetin dúnıeler az emes. Mundaǵy qundylyqtardyń birqatar bóligi kóne shahardaǵy qazba jumystary kezinde tabylsa, endi qalǵan bir bóligin qala turǵyndary ózderi arnaıy ótkizgen eken.
Mýzeı ishindegi jádigerlerdiń biri – qoladan jasalǵan er adam músini. Aıryqsha stılde jasalǵan qundylyq kózge ottaı basylady. Mamandar ony Býdda músini dep te aıtyp jatady. Derekke júginsek, jádiger 50 jyldan astam ýaqyt buryn burynǵy kók bazar aýmaǵynan tabylǵan kórinedi.
«Bilikti mamandardyń aıtýynsha, músindegi er adam mońǵol násildes kórinedi. Bajaılap qaraǵan kisi onyń kózi men murnyn, aýzy men qulaǵyn sheberler bederlep jasaǵanyn birden ańǵarady. Ústindegi shapannyń qýys jaǵy zıgzag relefimen jıektelgenin baıqaý qıyn emes. Keýde tusyndaǵy saqınaǵa uqsas bederli alqany mamandar yqylym zamannyń belgili bir beınesi dep te jatady.
Qoladan quıylyp jasalǵan músinge mýzeıge kelýshiler uzaq qarap jatady. Onyń belbeýi, ústindegi kıimi, alqasy, aıaq kıimindegi erekshelikter týraly suraıtyn saýatty azamattar az emes. Bir sózben aıtqanda, er adam músinine qyzyǵýshylar kóp», deıdi oblystyq tarıhı-ólketaný mýzeıiniń qyzmetkeri Laýra Baıtursynova.
Maman keltirgen derekke júginsek, qoladan jasalǵan músin 1972 jyly tabylǵan kórinedi. Sodan beri oblystyq-tarıhı ólketaný mýzeıinde saqtaýly tur. Elý jyl buryn qolǵa túsken músin áli kúnge deıin aıtarlyqtaı búline qoımaǵan.
«Qandaı sheberdiń qolynan shyqsa da, músinniń óte sapaly jasalǵanyn baıqaý qıyn emes. Jarty ǵasyrdan astam ýaqyt buryn tabylsa da áli kúnge deıin bastapqy sapasy saqtalǵan. Osyǵan qarap-aq músindi jasaǵan sheberdiń shyn máninde kásipqoı maman ekenin ańǵarýǵa bolady», deıdi L.Baıtursynova.
Taraz