Ulttyq biryńǵaı testileý bastalǵaly beri Qarmaqshy aýdanyndaǵy №121 mektep oqýshysy Maqsat Qýanyshbek pen Jańaqorǵandaǵy №54 mektep túlegi Arýjan Shazat 136 ball ıesi atanyp, bilim báıgesindegi alǵashqy orynda turǵan edi. Synaqtyń aıaqtalýyna 1 kún qalǵanda Qazaly aýdanynda eń joǵary upaı tirkeldi. Aýdan ortalyǵy Áıteke bı kentindegi №204 mekteptiń túlegi Nurbolat Jubatqan 139 ball jınady.
Oblys boıynsha 16 mamyr – 5 shilde aralyǵyndaǵy synaqqa 8 240 túlektiń 89,7% qatysty. Oblystyq bilim basqarmasynyń dereginshe, testileýdiń sońǵy kúnderi 100-den joǵary upaı jınap, ustazdary men ata-analarynyń úmitin aqtaǵan oqýshy kóp. Kósh basynda osyǵan deıin hımııa páninen aýdandyq, oblystyq, respýblıkalyq pán olımpıadalarynyń jeńimpazy atanǵan qazalylyq Nurbolat Jubatqan tur.
Nurbolat – mektepti «Altyn belgimen» aıaqtap otyrǵan eki oqýshynyń biri. Bıylǵy oqý jylynyń ózinde XVI Prezıdenttik olımpıadasy men «Altyn túlek» matematıka olımpıadasynyń óńirlik kezeńinde top jarǵan talantty túlektiń tańdaý páni hımııa-bıologııa bolyp tur.
Daryndy shákirttiń bul jeńisi alǵashqy muǵalimi Jadyra Dálıvadan bastap, keıin talabyn ushtaǵan Shakızada Esenova, Jańagúl О́tenalıeva, Gúlnur Kenjeǵaraeva, Aıman Aıapova, Nurgúl Jumahanova sekildi ustazdar eńbeginiń jemisi.
Qyzylorda oblysy, Qazaly aýdany