Qyrǵı – jaratylysy qarshyǵa tuqymdasqa jatatyn ádemi qus. Biraq ol qarshyǵadan kishirek, jaǵaltaı men turymtaıdan úlkenirek bolady. Elimizdiń taýly ólkeleri Altaı, Tarbaǵataı, Jetisý jerin mekendeıdi.
Qyrǵıdyń denesi úlken, ózi júndes, aq-kók tústes keledi. Baýyry aq shubar. Jilinshigi uzyn, qanaty quladynnyń qanaty sııaqty.
Jýyqta «ASBK» baspasynan jaryq kórgen «Qazaqstan qustary» atty ǵylymı anyqtamalyqta «bul qustyń denesiniń jalpy uzyndyǵy – 28-41 sm, qanat qulashy – 64-80 sm, salmaǵy – 100-340 gramm», dep jazylypty.
Qyrǵıdyń Qara tarlan degen túri bolady. Onyń denesi ortasha, bitimi ádemi. Syrtqy júnderi qońyr-kók, baýyrynyń shubary qara tarlan keledi. Kózi qyzyl shegir. Qyrǵıdyń qyrany – osy Qara tarlan.
Qyrǵıdyń endi bir túri qyzyl shubar dep atalady. Bul – eń kishkenesi. Syrtqy júnderinde aq tanadaı teńbili bar. Baýyr júni kók shubar. San júnderi qyzyl shubar bolady. Qyrǵıdyń osy qyzylynan qyran shyǵady. Dene turǵysynan: iri, ortasha, kishkene dep úshke bólinedi.
Otandyq ornıtologterdiń málimetine júginsek, qyrǵı naýryz jáne mamyr aılarynda uıa basady. Jumyrtqasyn 35 kúndeı shaıqaıdy. Balapan shyqqan soń ony qorektendirý 50 kúnge sozylady. Kúzdiń sońǵy aılarynda jyly jaqqa ushyp ketedi.