Osy jyldyń 20-22 tamyz aralyǵynda Tájikstanda Qazaqstannyń mádenıet kúnderi ótedi. Bul týraly Mádenıet jáne aqparat mınıstrligi habarlady, dep jazady Egemen.kz.
Tájikstandaǵy Mádenıet kúnderi aıasynda birqatar iri is-shara ótkizý josparlanǵan.
Máselen, 20 tamyz kúni Dýshanbe qalasyndaǵy «Vatan» kınoteatrynda otandyq kıno kúnderi ashylady.
22 tamyz kúni saǵat 19:00-de «Kohı Borbad» memlekettik kesheninde Qazaqstan óner sheberleriniń qatysýymen gala-konsert ótedi, oǵan Qazaqstannyń halyq ártisteri men eńbek sińirgen qaıratkerleri, sondaı-aq halyqaralyq konkýrs laýreattary qatysady.
Sonymen qatar gala-konsert bastalmas buryn «Kohı Borbad» memlekettik kesheni foıesinde Qazaqstan Respýblıkasynyń Ulttyq mýzeıiniń qorynan «Qazaq halqynyń qoldanbaly-sándik óneri» atty kórmesi usynylady. Kórmeniń negizin XVIII-XX ǵasyrlardaǵy qoldanbaly ónerdiń biregeı zattary quraıdy.