Taǵdyrdyń taýqymetin tartsa da ómirge qulshynysy óshpegen jandarǵa kómek qolyn sozý – qoǵamǵa paryz. Aıaq-qoly bútin bolsa da memleketten kómek kútip otyratyndarǵa qaraǵanda, shama-sharqynsha eńbekke aralasqysy keletin múgedektigi bar jandardyń qareketi kóńilge qýanysh syılaıdy. Osy rette múgedektigi bar jandardyń el qatarly ómir súrýine járdem etip júrgen «Invataksı» qyzmeti Jetisýda aıryqsha damyp keledi.
«Invataksı» qyzmetiniń avtokóligi Taldyqorǵan qalasynyń «Bolashaq» shaǵyn aýdanynda ornalasqan 3 birdeı úıdiń aýlasyna toqtap, Gúlnar Nurǵalıeva, Jadyra Qasymova, Nurbek Turǵanov syndy múgedektigi bar jandarǵa qyzmet kórsetip, jumysyna jetkizdi. Aldymen atalǵan shaǵyn aýdandaǵy №24 úıge kelip, kólik júrgizýshisi múgedekter arbasyna tańylǵan Gúlnar Nurǵalıevaǵa amandasyp, kólikke otyrýyna kómektesti. Gúlnar Taldyqorǵan qalasynyń jumyspen qamtýdy úılestirý jáne áleýmettik baǵdarlamalar bólimindegi jumys ornyna jetýge 10 jyldan beri «Invataksı» qyzmetin paıdalanady. Taldyqorǵan qalasyndaǵy «Aqjanel» medısınalyq saýyqtyrý ortalyǵynda medbıke bolyp jumys isteıtin Jadyra Qasymova da «Invataksı» qyzmetine dán rıza.
«Taǵdyr talqysyn kórip júrsek te, bizdiń de arqalaǵan arman, alǵa qoıǵan maqsatymyz bar. Tirlik etýimiz, qoǵamǵa paıdamyzdy tıgizýimiz kerek. Bul oraıda «Invataksı» qyzmetiniń oblys ortalyǵynda jumys isteıtinine qýanyshtymyn. Júrgizýshiler bizdi kólikke otyrǵyzyp, dittegen jerimizge jetkizip júr. Olardyń kúlimdep amandasqany, jyly shyraımen tildeskeni, qyzmetin erekshe shabytpen jasaǵany bizdi qýantady», dedi qos baldaqty serik etken aq halatty abzal jan.
Jetisý oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy Ermek Mızambaevtyń aıtýynsha, «Invataksı» qyzmeti «Memlekettik satyp alý týraly» zańnyń 41-baby 3-tarmaǵynyń 2-tarmaqshasyna, Kólik jáne kommýnıkasııa mınıstriniń 2013 jylǵy 1 qarashadaǵy №859 buıryǵymen bekitilgen «Avtomobıl kóligimen múgedektigi bar adamdardy tasymaldaý jóninde qyzmetter kórsetý qaǵıdalaryna» sáıkes júrgiziledi. Jalpy, Jetisý oblysynda «Invataksı» qyzmetin 8 úkimettik emes uıym júzege asyrady. Oblysta 2023 jyly jergilikti bıýdjet qarajaty esebinen 293,4 mln teńge bólinip, 14 jańa «Invataksı» avtokóligi satyp alynyp, búgingi kúni barlyq 14 avtokólik qalalyq, aýdandyq jumyspen qamtý jáne áleýmettik baǵdarlamalar bólimderine berildi. Nátıjesinde, oblysta «Invataksı» sany 1 jylda 2 esege artty.
Aıta keterligi, 2024 jyldyń toǵyz aıynda «Invataksı» qyzmetine oblysta barlyǵy 60 myńnan astam ótinish kelip túsken. Búginde Taldyqorǵan qalasynda 2 «Invataksı» qyzmeti jumys isteıdi. Onyń biri – «Erlik» qoǵamdyq birlestigi, munda 8 kólik bar, al «Qazaq zaǵıptar qoǵamy» QB «Taldyqorǵan» korporatıvtik qorynda 5 kólik qyzmet kórsetedi. Atalǵan qyzmet túriniń jumys barysymen tanysýǵa arnaıy shyqqan óńir jýrnalısterine shara barysynda «Invataksı» jobasynyń úılestirýshisi Nurbek Turǵanov túsinik berdi.
«Osydan 10 jyl buryn «Erlik» múgedekter qoǵamdyq birlestiginiń tóraǵasy Roza Aqjarkenovanyń bastamasymen «Invataksı» qyzmeti quryldy. Osy jobany iske asyra bastaǵan jyldary 3 avtomobıl azamattarǵa qyzmet kórsetse, qazir memleket qoldaýynyń arqasynda kólik sany 8-ge jetti. «Invataksı» qyzmetiniń júrgizýshileri múmkindigi shekteýli adamdardy jumysqa, oqýǵa, sporttyq is-sharalarǵa, ońaltý ortalyqtaryna aparyp, keıin úıine jetkizip otyrady» deı kele, N.Turǵanov atalǵan áleýmettik qyzmet memleket esebinen tegin júrgiziletinin aıryqsha aıtty.
«Invataksı» qyzmetin paıdalanýshylar osy qyzmetti qurýǵa, qoldaýǵa, iske asyrýǵa, damytýǵa qatysqan barlyq adamdarǵa alǵys jaýdyryp júr.
Jetisý oblysy