Byltyr óńirdegi «Aýyl amanaty» jobasynyń birinshi kezeńi eldegi kásip bastaýǵa talpynǵan talaı jannyń jolyn ashty. Aımaqta jobanyń alǵashqy jylynda 3 mlrd teńge bólinip, negizinen óndiristik jobalarǵa basymdyq berildi. О́zge de saladaǵy bastamalar qoldaýsyz qalǵan joq.
Shıeli aýdany Bıdaıkól aýylyndaǵy «Barly Bai & K» kooperatıviniń qyzanaq pastasyn óndiretin sehy – byltyrǵy bastama jemisi. О́ndiris ornyn ashqandar 27,6 mln teńge nesıe alyp, Reseıden tomat pastasy men konservilengen ónimderdi óndirý jelisin satyp alǵan. Táýligine 2 tonna ónim óndiretin seh sapa sertıfıkatyn da ıelenipti. Jobany iske asyrý barysynda kooperatıv músheleri retinde aýyl turǵyndary da tuqym, kóshet jáne mıneraldyq tyńaıtqyshtarmen qamtamasyz etildi.
Osy aýdandaǵy jeke kásipker Bıbinur Mútálipovanyń bronhıt, júrek aýrýlary, demikpe men allergııany emdep, aldyn alýǵa kómektesetin tuzdy bólme ashýyna da jobanyń septigi tıdi. Bastamany júzege asyrýǵa kásipker 8,6 mln teńge kóleminde shaǵyn nesıe alypty.
Shıelidegi «honeymood» nan-toqash jáne kondıterlik sehynyń ónimderi qazir kópke tanymal. Kásipker Jansaıa Imantaeva 2019 jyly «Bastaý bıznes» baǵdarlamasymen osy óndiristi bastap, byltyr «Aýyl amanaty» baǵdarlamasyna qatysyp, nesıege 7 mln teńge alǵan. Kásipker «Mansap» ortalyǵynda oqýdy bitirgen jas mamandardy jumyspen qamtamasyz etedi.
«Aýyl amanaty» jobasymen 1 tomat pastasy sehy, 34 jylyjaı ashylyp, 671 asyl tuqymdy mal alynǵan. Sonymen birge 21 sút jáne et ónimderi óndirisi iske qosylyp, 66 aýyl sharýashylyǵy tehnıkasy ákelindi. 14 balyq, 18 qus sharýashylyǵy da – osy jobanyń jemisi. Joba qatysýshylarynyń arasynan 38 adam kondıter jáne nan ónimderin pisirýmen aınalysady, 3 gıdroponıka, 7 jıhaz, 34 plastıkalyq ónimder men qurylys materıaldary óndirisi, 98 qyzmet kórsetý orny ashyldy. Osylaısha, byltyr júzdegen jobaǵa nesıe berilip, 713 jumys orny ashylǵan.
Jýyrda ǵana qala irgesindegi Besaryq aýylynda «Aýyl amanaty» sheńberinde 4 óndiris orny jumysyn bastap ketti.
Jurtqa úmit pen senim syılaǵan jobanyń ekinshi kezeńi aıasynda bıyl 4 mlrd 600 mln teńge qarjy bólinedi. Endi ákimder baǵdarlamanyń artyqshylyǵyn tıimdi paıdalanyp, aýyl halqynyń tabysyn ósirýge umtylýǵa tıis.
«Baıqońyr» áleýmettik-kásipkerlik korporasııasynyń basqarýshy dırektory Madalı Álisheruly turǵyndardyń ál-aýqatyn arttyryp, tabysyn molaıtýǵa negizdelgen bastama sheńberinde osy jyly 575 joba qarjylandyrylyp, 610 jańa jumys ornyn ashý kózdelip otyrǵanyn jetkizdi. О́ńir ereksheligine qaraı basymdyq óndiristik jobalarǵa berilip otyr. Al mal sharýashylyǵyna qatysty jobalarmen qatysqandarǵa asyl tuqymdy mal satyp alý talaby qoıylady. Bul tórt túlik tuqymyn túrlendirýmen qatar monıtorıng kezinde jaqyndarynyń malyn tirkep qoıyp, qarjyny qalaǵanynsha jaratyp júrgenderge tosqaýyl bolmaq.
Jaýaptylar nesıe qarjysy 4 baǵytqa baǵdarlanatynyn aıtyp otyr. Aýyl sharýashylyǵy ónimderin óńdeý salasy boıynsha 108 joba qarjylandyrylsa, eginshilik salasynda 81 jobaǵa qoldaý kórsetiledi. Mal sharýashylyǵy boıynsha 123, basqa da túrli baǵyttaǵy 263 joba maquldanady dep josparlanǵan.
Qyzylorda