Atyraý oblysy ákiminiń baspasóz hatshysy Rýslan Jumaǵazıevtiń habarlaýynsha, 20 qarashada «Asyl-Agro» sharýa qojalyǵynyń mal soıý pýnkti aýmaǵyna karantın engizilgen. Buǵan óli sıyrdan sibir jarasy belgileriniń anyqtalýy sebep bolǵan, dep habarlaıdy Egemen.kz.
«Laboratorııalyq taldaý mal soıý sehyndaǵy jumysshylardyń birinde teri sibir jarasy dıagnozyn rastady. Ol aýrýhanada jatyr, jaǵdaıy turaqty, medısınalyq hattamaǵa sáıkes emdelip jatyr. Basqa jumysshylarda aýrý tirkelgen joq», dedi R.Jumaǵazıev.
Onyń aıtýynsha, ınfeksııa oshaǵynda sanıtarlyq-veterınarlyq normalarǵa sáıkes jumystar jalǵasyp jatyr.
«Veterınarlyq qyzmetter karantındik aýmaqta barlyq janýardy vaksınasııalaýdy aıaqtap, dezınfeksııa júrgizip jatyr. Iri qaranyń ımportyn baqylaý úshin Atyraý oblysynda tórt polısııa jáne veterınarlyq baqylaý beketi quryldy. Egýlerdi, janýarlardyń jaı-kúıin rastaıtyn qujattar tekseriledi jáne termometrııa júrgiziledi. Sondaı-aq qalanyń mal soıý pýnktterinde osyndaı sharalar qabyldandy», dep habarlady Rýslan Jumaǵazıev.
Esterińizge sala keteıik, veterınarııalyq qujatsyz maldy tasymaldaýǵa jáne soıýǵa qatań tyıym salynady.