Jambyl oblysynda keıingi jyldary áleýetti ınvestorlar tartý arqyly óndiris oshaqtaryn kóbeıtýge basymdyq berilip otyr. Jergilikti atqarýshy bılik ókilderi sheteldik jáne otandyq ınvestorlarǵa qoldan kelgenshe qoldaý kórsetedi. Jyl basynan beri óńirde eki zaýyt ashyldy. Mamyr aıynda «Taraz» ındýstrııalyq aımaǵynda metallýrgııalyq kásiporyn iske qosylmaq.
Oblys ortalyǵynan 110 shaqyrym qashyqta jatqan Turar Rysqulov aýdanynda jańa kásiporyn jumysyn bastady. Birshama ýaqyt buryn qurylysy bastalǵan mıneraldy aýyzsý shyǵaratyn zaýyt birneshe kún buryn paıdalanýǵa berildi. Saǵatyna 3 myń lıtr mıneraldy sý shyǵaratyn óndiris oshaǵynyń basshylary birinshi kezekte ishki naryqty qamtýǵa bekinip otyr. Aýdan ákimi Ernar Esirkepovtiń aıtýynsha, jobany tolyqqandy júzege asyrý úshin «Parýs-T» JShS 200 mln teńge kóleminde ınvestısııa salǵan.
«Memleket basshysynyń óńirlerge ınvestısııa tartý týraly tapsyrmasy nazarymyzdan tys qalǵan emes. О́ńir basshysy Erbol Qarashókeevtiń tikeleı tapsyrmasy negizinde aýdanymyzda ilkimdi jobalar qolǵa alyndy. Aldaǵy ýaqytta óndiris oshaqtary sanyn arttyrý boıynsha naqty jumys atqaramyz. Rahym Sábdenov aýlynda jańadan ashylǵan kásiporynnyń qurylysy 2023 jyly bastalǵan. Joba eki kezeń boıynsha júzege asty. Bastapqyda qajetti qural-jabdyqtar satyp alynsa, 2024 jyly qytaılyq bilikti mamandar zaýytty iske qosýmen aınalysty. Jergilikti atqarýshy bılik ókilderi otandyq ónimdi qoldaıdy. Biz óz tarapymyzdan qoldan kelgenshe kómektesýge ázirmiz. О́ndiris oshaqtary kóbirek ashylǵan saıyn jańa jumys oryndaryn qurý múmkindigi artady», deıdi aýdan ákimi.
Rahym Sábdenov aýyly aýmaǵynda ornalasqan jańa zaýyttyń qurylys jumysyna 30 adam tartylǵan bolsa, óndiris oshaǵy iske qosylǵannan keıin munda 15 azamat turaqty jumyspen qamtylyp otyr. Al alystaǵy aýylda salynǵan zaýyt ónimi «Baital» ataýymen naryqqa shyqpaq. Investorlardyń aıtýynsha, ónimniń baǵasy qoljetimdi.
«Zaýyt shyǵaryp otyrǵan mıneraldy aýyzsýdy jergilikti azamattar paıdalanady degen senim zor. О́nimde adam aǵzasyna paıdaly elementter barshylyq. Baǵasy naryq qunymen salystyrsaq, tutynýshylar úshin óte tıimdi bolyp tur. Mıneraldy aýyzsý kásiporny salynbas buryn túrli laboratorııalyq zertteý jumysy júrgizildi. Barlyq zertteý jumysynyń nátıjesi biz óndiretin sýdyń sapasy óte joǵary ekenin aıqyndady. Ol qujattyń barlyǵy qolymyzda bar. Bir sózben aıtqanda, barlyq sanıtarlyq normaǵa saı ekeni dáleldendi. Qutydaǵy aýyzsýdyń kólemi 0,33, 0,5, 1 jáne 1,5 lıtr bolyp naryqqa jol tartady», deıdi kásiporyn basshysy Maıra Rahımova.
Kásiporyn basshysynyń aıtýynsha, zaýyt jumysyn órkendetý boıynsha naqty jospar bar. Ol aldaǵy ýaqytta bedeldi kásipkerlermen kelissóz júrgizý arqyly «Baital» mıneraldy aýyzsýyn naryqqa molynan shyǵarýdy josparlap otyr. Ázirge jergilikti kásipkerler qoldan kelgenshe qoldaý kórsetýge ázir ekendikterin baıqatqan. Tıisti qoldaýdy tapsa, «Baital» mıneraldy sýy Qulannyń brendine aınalýy da múmkin.
Ernar Esirkepovtiń aıtýynsha, aımaqta jalpy quny 16,1 mlrd teńge bolatyn 20 ınvestısııalyq jobany júzege asyrý kózdelgen. Birqatar áleýetti ınvestormen birlesip jumys isteý jóninde kelissóz júrgizilgen. Bul jobalar tolyǵymen júzege asqan kezde 500 jańa jumys ornyn qurýǵa múmkindik týmaq.
Jambyl oblysy,
Turar Rysqulov aýdany,
Rahym Sábdenov aýyly