Almaty oblysy, Qarasaı aýdanyna qarasty Kókózek aýylynda «KT&G Kazakhstan» JShS zaýytynyń saltanatty ashylý rásimi ótti. Bul – Ońtústik Koreıanyń iri korporasııasynyń Qazaqstandaǵy alǵashqy jobasy jáne ol tolyǵymen jeke ınvestısııalar arqyly júzege asyryldy, dep habarlaıdy Egemen.kz.
Jańa kásiporyn óńirdegi eń iri óndiristik nysandardyń biri bolmaq. Jalpy ınvestısııa kólemi – 70 mıllıard teńge, bul qarjynyń barlyǵy kompanııanyń jeke kapıtaly esebinen quıylǵan. Zaýyt jobalyq qýatyna shyqqan soń Eýrazııa men TMD naryǵyna sapaly ónim jetkizýdi qolǵa alady. Zaýyt arqyly Qazaqstan bıýdjetine jyl saıyn shamamen 25 mıllıard teńge salyq túsedi dep kútilýde.
Qazirgi tańda zaýytta 130 qyzmetker jumys isteıdi. Aldaǵy ýaqytta kásiporyn keńeıgen saıyn jumys oryndarynyń sany artady.
«Bul zaýyt – biz úshin mańyzdy qadam. Qazaqstan – zor áleýetke ıe bolashaǵy bar naryq. Biz bul seriktestiktiń tabysty bolatynyna senimdimiz», dedi «KT&G Kazakhstan» JShS bas dırektory Pak Hıon Ýk.
Zaýyttaǵy óndiris prosesi tolyqtaı avtomattandyrylǵan jáne halyqaralyq sapa standarttaryna tolyq sáıkes keledi. Shıkizatty satyp alýdan bastap, daıyn ónimdi oraýǵa deıingi barlyq kezeńde qatań baqylaý júıesi jumys isteıdi.
Almaty oblysynyń ákimi Marat Sultanǵazıev bul jobanyń óńir úshin mańyzdylyǵyn erekshe atap ótti.
«KT&G zaýytynyń ashylýy – jańa óndiristi iske qosý ǵana emes. Bul – Qazaqstan men Koreıa arasyndaǵy 33 jyldyq seriktestiktiń nátıjesi jáne Almaty oblysynyń ınvestısııalyq tartymdylyǵynyń jarqyn dáleli. Biz halyqaralyq seriktestik úshin barlyq jaǵdaıdy jasap, bizdiń óńirdi tańdaıtyn kompanııalardy árdaıym qoldaımyz», dedi óńir basshysy.
Zaýyttyń ashylý rásimine 100-den astam qurmetti qonaq qatysty. Olardyń arasynda Koreıa Respýblıkasynyń Qazaqstandaǵy Tótenshe jáne О́kiletti Elshisi Chjo Te-ık pen KT&G korporasııasynyń bas dırektory Pan Kıongman boldy. Qonaqtar úshin qazaq-koreı mádenı baǵdarlamasy uıymdastyrylyp, óndiris sehtaryna ekskýrsııa ótkizildi.
Jańa zaýyttyń iske qosylýymen KT&G Eýrazııa naryǵyndaǵy óz pozısııasyn kúsheıtip, Qazaqstan ekonomıkasyna qomaqty úles qosýda – jumys oryndaryn ashyp, eksportty qoldap, jergilikti óndiristi damytýǵa atsalysýda.
Almaty oblysy