Qasym-Jomart Toqaev Horvatııanyń Syrtqy jáne eýropalyq ister mınıstri Gordan Grlıch-Radmanmen kezdesý ótkizdi, dep habarlaıdy Egemen.kz Aqordanyń baspasóz qyzmetine silteme jasap.
Prezıdenttiń aıtýynsha, Gordan Grlıch-Radmannyń bul sapary Horvatııanyń ekijaqty qarym-qatynasqa tyń serpin berýge nıetti ekenin kórsetedi. Memleket basshysy eki el arasyndaǵy yqpaldastyq ózara senim men syndarly dıalog rýhynda damı beretinine senim bildirdi.
Prezıdent horvat kompanııalary Qazaqstan naryǵynda energetıka, ınfraqurylym, farmasevtıka jáne tamaq ónerkásibi sııaqty salalarda jumys isteýge qyzyǵýshylyq tanytyp otyrǵanyn aıtty. Qazir elimizde Horvatııanyń úlesi bar 30-dan astam kompanııa tabysty qyzmet etedi. Olardyń qatarynda Pliva jáne Podravka sekildi tanymal brendterdi aıtýǵa bolady.
Memleket basshysy búgingi Qazaq-horvat bıznes forýmyna Horvatııanyń kóptegen iri bıznes ókili qatysyp jatqanyn qoldady. Jıyn aıasynda qol jetkizilgen kelisimder saýda-ınvestısııalyq yntymaqtastyqtyń órisin keńeıtýge yqpal etetinine toqtaldy.
Budan bólek, kezdesýde mádenıet jáne bilim salalaryndaǵy baılanystardy nyǵaıtý perspektıvasy talqylandy.