Shymkenttegi «Ońtústik» arnaıy ekonomıkalyq jáne «Juldyz» ındýstrıalyq aımaqtarynda úsh óndiris orny ashyldy, dep habarlaıdy Egemen.kz.
Kásiporyndardyń ashylý saltanatynda sóz sóılegen qala ákimi Ǵabıt Syzdyqbekov megapolıs ekonomıkasy men óndiris salasy úshin bul aıtýly kún ekenin jetkizdi. Sondaı-aq jobany júzege asyrýǵa atsalysqan barsha azamattarǵa alǵysyn bildirip, kásiporyndy iske qosqan kompanııalardyń aldaǵy jumysyna sáttilik tiledi.
Aıta ketý kerek «Ońtústik» arnaıy ekonomıkalyq aımaǵynda iske qosylǵan óndiris oshaǵynyń biri «BIK Kanc» JShS. Onda A4 jáne A3 formattaǵy keńse qaǵazynyń óndirisi bastaldy. Jobanyń jalpy quny 500 mıllıon teńgeni quraıdy. Zaýyt jylyna 3,5 mıllıon dana qaǵaz qaptamasyn shyǵaryp, 35 turaqty jumys ornyn qamtamasyz etedi.
Ekinshi kásiporyn JK «ZeineP» fırmasy. Kásiporyn búginnen bastap jylyna 10 myń tonnaǵa deıin dezınfeksııalyq quraldar óndirýge kiristi. Munda 80 adam eńbek etedi. О́nimder ishki naryqpen qatar, TMD elderine de eksporttalatyn bolady.
Úshinshi kásiporyn týraly aıtsaq, «Juldyz» ındýstrııalyq aımaǵynda ornalasqan «Sauran Bricks» JShS-niń avtoklavty gazdy beton shyǵaratyn zaýyty paıdalanýǵa berildi. Bul joba – ońtústik óńirdi sapaly ári qoljetimdi qurylys materıaldarymen qamtamasyz etý maqsatynda júzege asyrylyp otyr. Jobanyń jalpy ınvestısııalyq quny – 7,8 mıllıard teńge. Zaýyt tolyq qýattylyqqa shyqqannan keıin úsh aýysymda 150 adamdy turaqty jumyspen qamtý kózdelip otyr. Kásiporynnyń óndiristik qýaty jylyna 200 myń m³ kólemde (kúnine 555 m³ nemese aıyna 16 500 m³) ónim shyǵarýǵa qaýqarly.
Jobany iske asyrý úshin «Juldyz» ındýstrııalyq aımaǵynan 5,2 gektar jer telimi bólingen. Qurylys-montaj jumystary tolyq aıaqtalyp, óndiristik keshenge Qytaıdyń KEDA kompanııasynan jetkizilgen zamanaýı, avtomattandyrylǵan qural-jabdyqtar ornatylǵan. Bul óndiris tıimdiligin arttyryp, shyǵarylatyn ónimniń sapasyn qamtamasyz etýge múmkindik beredi.
Atalǵan kásiporyndardyń iske qosylýy óńirlik ekonomıkanyń damýyna, qurylys ındýstrııasynyń jandanýyna, ımportty almastyrýǵa jáne jańa jumys oryndarynyń ashylýyna eleýli úles qosady deıdi mamandar.
Aıta ketý kerek, mańyzdy úsh óndiris ornynyń ashylý saltanaty 19 maýsym – Qala kúnine qaraı oraılastyryp ótkizildi.
Shymkent