Citigroup sarapshylary Parsy shyǵanaǵyndaǵy strategııalyq mańyzy joǵary Ormuz buǵazy jabylǵan jaǵdaıda Brent markaly munaı baǵasy 90 dollarǵa deıin kóterilýi múmkin degen boljam aıtty. Bul týraly Bloomberg agenttigi habarlady, dep jazady Egemen.kz.
Ormuz buǵazy – álemdik munaı saýdasynyń basty ótkelderiniń biri. Qazir jahandyq naryqtaǵy munaıdyń shamamen 20%-y dál osy buǵaz arqyly tasymaldanady. Saýd Arabııasy, Irak jáne Parsy shyǵanaǵyndaǵy ózge de iri munaı óndirýshilerdiń eksporty osy baǵytqa tikeleı táýeldi.
Citigroup esebinshe, Ormuz buǵazy jabylǵan jaǵdaıda kúnine 3 mıllıon barrelge jýyq munaı tasymaly toqtaýy múmkin. Mundaı kedergi qysqa merzimniń ózinde baǵanyń kúrt ósýine jáne naryqtaǵy turaqsyzdyqqa sebep bolady. Degenmen sarapshylar shıelenistiń uzaqqa sozylmaıtynyn, óıtkeni buǵazdyń ashyq kúıde bolýy barlyq taraptardyń ortaq múddesi ekenin alǵa tartyp otyr.
Bloomberg derekterine súıensek, Iran munaıynyń eksportyna tyıym salynǵan kúnniń ózinde bul faktor munaı baǵasyna aıtarlyqtaı áser etpeýi múmkin. Buǵan deıin de sarapshylar Taıaý Shyǵystaǵy geosaıası shıelenister munaı baǵasyn 120 dollarǵa deıin kóterýi yqtımal ekenin eskertken bolatyn.
Qazir Brent markaly munaı fıýchersteri barreline 77 dollar shamasynda saýdalanyp jatyr. 2025 jyldyń 19 maýsymynda ótken Úkimet otyrysynda Ulttyq bank tóraǵasy Tımýr Súleımenov munaı baǵasynyń joǵary bolýy Qazaqstan ekonomıkasy úshin oń áser etetinin atap ótti.
Sarapshylardyń aıtýynsha, jahandyq naryqtaǵy munaı baǵasynyń kúrt ósýi ınflıasııalyq qysymdy kúsheıtip, keıbir elderdiń ishki ekonomıkalyq saıasatyna túzetýler engizýine sebep bolýy múmkin. Osy oraıda Ormuz buǵazy tóńiregindegi jaǵdaı álemdik ekonomıkalyq turaqtylyqqa tikeleı yqpal etetini anyq.