Qyzylorda qalasynda qurylys salasy jyl saıyn qarqyn alyp keledi. Ásirese darııanyń sol jaǵalaýyndaǵy kópqabatty úılermen qatar túrli nysan boı kótergen jańa aýdannyń kelbeti aıshyqty. Alǵashqy úıler onshaqty jyl buryn ǵana salynǵan sol jaǵalaý qazir aýqymdy qurylys alańyna aınalǵan.
Oblysta qurylyspen aınalysatyn seriktestikter qatary da artqany baıqalady. Solardyń biri – kóp jyldardan beri baspana kezegin kútken myńdaǵan adamǵa qýanysh syılaǵan «Sát-servıs» kompanııasy. Byltyr oblys ortalyǵynda aýmaǵy 8,8 myń sharshy metrden asatyn «Jaıly mekteptiń» birin salǵan «Sát-servıs» osy kúni salada aty alǵashqylar qataryna atalatyn seriktestikter qatarynda tur. Bizdiń búgingi keıipkerimiz Marat Qasymbekov osyndaı irgeli ujymnyń bir múshesi ekenin maqtan tutady.
Joǵary oqý ornynan munaıshy mamandyǵyn alǵan jas jigit bastapqyda óńirdegi «qara altyn» óndiretin kompanııalardyń birinde eńbek etti. Alty jyldan keıin burynǵy tabysty kásiporyndaǵy jumys yrǵaǵy irkiliske ushyraı bastady. О́ńirdegi munaı qorynyń taýsylýǵa taıaǵany da bul jumystyń keleshegin kúmándi ete bastap edi. Sóıtip júrgende aıaq astynan jumyssyz qaldy. Kóp oılanbaı, qurylysqa adam izdep jatqan «Sát-servıs» kompanııasyna keldi. Isti jańadan kelgenderdiń bári basynan ótkergen beton quıýdan bastady, tas qalaýshy boldy. Bul jumysta aǵa áriptesi Baqytjannyń kómegi kóp tıdi.
«Qazirgi jurttyń kózine «qurylys» dese beınetke belshesinen batyp júrgen jandar elesteı ketetini ras. Áıtse de, búginde jańa tehnologııa bul salaǵa da jetken, jumystyń aýyryn tehnıka atqarady. Osynyń arqasynda eń aýyr is – beton quıý da burynǵydan kóp jeńildegen. Árıne, qaı salada da bastapqyda qınalasyń. Men jumys isteı júrip, osy mamandyqqa qosymsha oqyp aldym», deıdi ol.
Bul salada júrgenderdiń birligi erekshe eken. Bilmegenin úıretkennen bólek, qınalyp jatsań árdaıym kómegi daıyn turady. Taǵy bir baıqaǵany – qurylysta oqýdy jańadan bitire sala jurtqa bılik aıtyp, basshy bolý ońaı emes. Ár jumysta ábden pisip, isti kóziń tanıtyn dárejege jetkenińde ǵana eshkim seniń sózińdi eki ete almaıdy. Osy kúni prorab qyzmetin atqaryp júrgen Marat ta osyndaı joldardan ótti.
Qazirde qystyń kúni qurylys salýǵa qarsylar qatary kóp. Biraq Marat bul pikirmen kelise qoımaıdy. О́ıtkeni qazir jylýdy qalypty ustap turatyn qondyrǵylar bar. Eshkim de óziniń salǵan úıinen shıkilik shyqqanyn qalamaıdy. Qaı kompanııa bolsa da áýeli sapaǵa mán beredi. Onyń ústine tehnıkalyq, avtorlyq qadaǵalaý, tıisti basqarmalar men zerthanalar da kemshilikke jol bere qoımaıdy. Olar salǵan úıi synǵa ilikkenderge aqaýyn qalypqa keltirtpeı tynym tappaıdy. Adal eńbektiń arqasy bolar, osy ýaqytqa deıin bular salǵan qurylysqa kiná artatyndar kezdespepti.
Búginde jergilikti jigitterge senbeı, mamandy syrt memleketten aldyratyndar da kezdesip qalady. Árıne, qaltasyndaǵy qarjysyn qaıda, qalaı jumsaımyn dese de árkimniń erki biledi. Biraq Marattyń jańaǵydaı pikirdiń keń etek alyp kele jatqanyna qynjylatyny bar. Qazir jumys izdep kelgen jergilikti 10 jigittiń jeteýi myqty qurylysshyǵa aınalyp otyr. Tas qalaýdan bólek, sylaý, árleýdi de meńgergen mamandar kóp. Syrttan nápaqa izdep kelgenderdi keýdesinen keri ıterip jatqan eshkim joq, biraq qurylysty jergilikti jerdiń klımattyq jaǵdaıyn jaqsy biletin ózimizdiń jigitter salǵany durys.
«Buryndary kirpishten bastap qurylysqa qajetti materıaldardyń kóbin syrttan tasıtyn edik. Qazir solardyń kóbi ózimizden shyǵyp jatyr. Mysaly, kirpishtiń kúıdirilgeni de, syrtyn árleıtini de Qyzylordada óndiriledi. Jergilikti óndiris ishki jumystarǵa arnalǵan gıpster, jelimder, kafelder de shyǵaryp jatyr. Olardyń sapasy da da sheteldik materıaldardan bir mysqal da kem emes», deıdi ol.
Marat qurylǵanyna 20 jylǵa jýyqtaǵan kompanııada jumys isteı júrip, mol tájirıbe jınaqtady. Byltyr taǵy bir úıdi ýaqtyly tapsyryp, onyń ashylýynda oblys ákiminiń qolynan marapat aldy. Osynyń bári adal is adamdy árdaıym alǵa shyǵaratynynyń aıqyn dáleli.
QYZYLORDA