Amerıkalyq Netflix platformasy fýtboldan aǵylshyn Premer-lıgasynyń translıasııasyn kórsetý quqyǵyn alýdy kózdep otyr. Alyp kompanııa jazylýshylarǵa arnalǵan sport týraly kontent sanyn kóbeıtkisi keledi, dep jazady Egemen.kz.
Netflix platformasy Champions League matchtaryn Ulybrıtanııada kórsetý quqyǵy úshin bolǵan básekede Paramount+ platformasynan jeńilip qalǵan. Sol úshin de sport baǵyty Netflix úshin basym baǵytqa aınaldy.
Endi amerıkalyq alyp kompanııa nazaryn Premer-lıgaǵa burdy. Platforma Ulybrıtanııada matchtardy kórsetý múmkindigi úshin Sky Sports jáne TNT Sports telearnalarymen básekege túspek. Sonymen qatar Netflix dál osy quqyq úshin AQSh-ta NBC telekompanııasymen de jarysady.
Qazirgi ýaqytta Ulybrıtanııadaǵy Premer-lıga matchtaryn teledıdardan kórsetý quqyǵy 2029 jylǵa deıin bólingen. Al NBC-men jasalǵan kelisim 2028 jylǵa deıin kúshinde. Kelesi kezeńge arnalǵan quqyqtardy bólý aldaǵy on eki aı ishinde ótedi.
Aıta keterligi, áleýetti habar taratýshylary qataryna Netflix-tiń qosylýy Premer-lıga klýbtarynyń tabysyn arttyrýy múmkin. Sebebi mundaı iri platformanyń saýdaǵa qatysýy teledıdardan kórsetý quqyǵynyń satý qunyn arttyrady.