Astana qalasyndaǵy TargetAI IT-kompanııasynyń keńsesinde №49 mektep-gımnazııasynyń 7-synyp oqýshysy Ádilhan Rústemulymen kezdesý ótti. Ádilhan mektepterdegi tóbeles jaǵdaılaryn anyqtaýǵa arnalǵan qaýipsizdik júıesiniń konsepsııasyn ázirlegen, dep habarlaıdy Egemen.kz.
TargetAI kompanııasy oqýshyny tanystyrý ekskýrsııasyn ótkizý, ázirleýshiler komandasymen kásibı dıalog ornatý, sondaı-aq elordanyń bilim berý uıymdarynda qoldanylyp júrgen jasandy ıntellekt negizindegi sheshimderdiń praktıkalyq múmkindikterin kórsetý maqsatynda arnaıy shaqyrdy.
Kezdesýge Ádilhannyń mektep jobasynyń jetekshisi Aıdos Bolatbekuly, ınformatıka pániniń muǵalimi Bekarys Batyrhanuly, TargetAI kompanııasynyń bıznesti damytý jónindegi dırektory Zarına Jahına, sondaı-aq kompanııa ázirleýshileri – Sherhan Syzdyqov, Nııaz Tóleýov jáne Ánýar Súleımenov qatysty.
Ádilhannyń jobasy býllıng pen tóbeles jaǵdaılaryn erte kezeńde anyqtaýǵa jáne olardyń aldyn alýǵa baǵyttalǵan. Kezdesý barysynda qatysýshylar jobanyń tehnıkalyq iske asyrylýyn, etıkalyq aspektilerdi jáne derbes derekterdi qorǵaý máselelerin talqylady.
Is-shara aıasynda Zarına Jahına TargetAI kompanııasynyń flagmandyq ónimi – TargetEYE platformasynyń múmkindikterin tanystyrdy. Búgingi tańda platforma Astana qalasy ákimdigi men Astana Innovations qoldaýymen iske asyrylyp jatqan «Keshendi qaýipsizdik júıesi» jobasy sheńberinde Astanadaǵy 122 memlekettik, 77 jekemenshik jáne 7 respýblıkalyq mekteptiń beınebaqylaý júıelerimen ıntegrasııalanǵan.
Jasandy ıntellektige negizdelgen avtomattandyrylǵan monıtorıng mektepterdiń kireberis aımaqtary men perımetrin baqylaýǵa, sondaı-aq tóbeles pen býllıngtiń paıda bolý jáne ýshyǵý táýekelderin tómendetýge múmkindik beredi. Oqıǵa anyqtalǵan jaǵdaıda TargetEYE júıesi dabyl sıgnaly bar oqıǵany qalyptastyryp, tıisti qyzmetterge jedel túrde habarlama joldaıdy.
2026 jylǵy aqpan aıyndaǵy jaǵdaı boıynsha TargetAI elimizdiń segiz qalasy men óńirinde beıneanalıtıka jobalaryn júzege asyryp otyr. Atap aıtqanda, Almaty, Shymkent qalalarynda, Mańǵystaý, Atyraý, Pavlodar, Jetisý, Batys Qazaqstan oblystarynda jáne «Býrabaı» memlekettik ulttyq tabıǵı parkinde Biryńǵaı beınemonıtorıng júıesi, sondaı-aq Astana qalasynyń mektepterinde Keshendi qaýipsizdik júıesi engizilgen. TargetAI ekojúıesine qosylǵan kameralardyń jalpy sany 120 000 qurylǵydan asady. Osylaısha, TargetAI platformasy «Zań jáne tártip» tujyrymdamasyn iske asyrý aıasynda is júzinde vedomstvoaralyq sıfrlyq qural retinde qyzmet atqaryp otyr.
TargetAI kompanııasy daryndy mektep oqýshylaryn erte kezeńde qoldaýdyń jáne jastardyń qoldanbaly tehnologııalyq quzyretterin damytýdyń mańyzdylyǵyn erekshe atap ótti.
«Bolashaqta biz Ádilhanǵa taǵylymdamadan ótý múmkindigin, sondaı-aq onyń jobasyn ári qaraı damytý úshin saraptamalyq jáne ınfraqurylymdyq qoldaý kórsetýge daıynbyz», dedi TargetAI kompanııasynyń bıznesti damytý jónindegi dırektory Zarına Jahına.