Jaz mezgili týysymen aq qum, altyn jaǵalaýly teńiz jaǵasy naǵyz taptyrmas demalys orny. Alaıda, osy teńiz túbine qansha jan jutylyp, qanshama qaıǵyly-qandy oqıǵalar oryn alyp jatyr deseńizshi...
Derek kózderi jaz bastalysymen Kaspıı teńizine 7 adamnyń sýǵa ketkendigin aıtýda. Búgingi kúnge deıingi sońǵy qaıǵyly oqıǵa 21 maýsym kúni Aqtaý qalasynan 25 shaqyrym qashyqtaǵy «Shora» jaǵalaýynda tirkeldi. Osy kúni bir otbasynyń 17 jáne 21 jastaǵy eki birdeı balasy sýǵa ketti.
Taıyz bolǵanmen, aǵysy qatty Shora qaýipti aımaq sanalady. Solaı bola tura oǵan sýǵa túsý úshin kelýshiler sany azaımaıdy, sýǵa batyp ketýshiler oqıǵasy buryn da tirkelgen. Bul joly qaıǵyly oqıǵaǵa dýshar bolǵan aǵaly-inili eki azamat Munaıly aýdanynyń turǵyndary eken. Sýda qutqarýshylardyń aıtýyna qaraǵanda, eń aldymen bireýi batyp bara jatyp, ekinshisinen kómek surapty. Sol mezette jandármen járdem kórsetýge kirisken ekinshisi de sýǵa batyp ketedi. Dál osy kezderde teńizde arna boıymen ótip jatqan aǵys qatty bolsa kerek. Alaıda, bul týraly aqparat qutqarý beketine kesh túsken. Mamandar birden izdestirý jumystaryna kirisip, birneshe saǵat ishinde inisiniń ǵana denesin tabady. Al ushty-kúıli joǵalǵan aǵasy izdestirilý ústinde, ázirge nátıje joq. Mamandar bul óńirdiń sýǵa túsi úshin qaýipti ekendigin uǵyndyratyn arnaıy belgilerdiń turýyna qaramastan, turǵyndardyń sýǵa túsýge jıi keletindigin aıtýda.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.