ASTANA. 25 aqpan. Keshe túnde Chempıondar lıgasynyń 1/8 fınaldaǵy kezekti eki oıyny oınaldy. Olardyń birinde – meımandar, ekinshisinde alań ıeleri jeńiske jetti. Bul týraly Football.ua habarlady.
Aǵylshynnyń Manchester qalasynda «Manchester Sıtı» men ıspannyń «Barselonasy» kezdesti. Bul eki komanda ótken jylǵy 1/8 fınaldyń birinshi matchynda da tap osylaı Albıon jerinde ushyrasqan edi. Onda manchesterlikter barselonalyqtardan 0:2 bolyp utylyp, is júzinde gırek fınalǵa shyǵý múmkindiginen aırylyp qalǵan. Bul joldy da jeńistiń jetegi «qalalyqtarǵa» qaraı qulady. Olar kezdesýdiń 16 jáne 30-mınýttarynda Lýıs Sýares (sýrette) soqqan eki goldyń arqasynda taǵy da 2:0 esebimen alǵa shyqty. Alaıda, oıynnyń ekinshi bóliginde, dáliregi 69-mınýtta Serhıo Agýero bir jaýap dop qaıtaryp, óz komandasyn «qurǵaq esepten» qorǵap qaldy. Bul joly da «Sıtıdiń» bir oıynshysy alańnan qýyldy. Biraq ol ótken jyly Demıkelıstiń alańnan ketkenindegideı oıynnyń aqyrǵy nátıjesine áser ketken joq. Sebebi, Gael Klıshı 74-mınýtta «qyzyl qaǵaz» alǵanǵa deıin-aq ol naqtylanyp qoıylǵan edi. Degenmen, matchtyń eń sońǵy demi soǵylyp jatqanda barselonalyqtardyń taǵy bir gol soǵatyndaı múmkindikteri bolyp edi. Áıtkenmen, Lıonel Messı 90+4 mınýtta belgilengen penaltıdi soǵa almady.
Italııanyń Týrın qalasynda jergilikti «Iýventýs» pen Germanııanyń «Borýssııa» (Dortmýnd) komandalary ushyrasty. Munda da 2:1 degen esep tirkeldi. Biraq ol alań ıeleriniń paıdasyna sheshildi. Qorytyndy esep birinshi taımda-aq jasalyp qoıdy. Esepti týrındik Karlos Teves 13-mınýtta ashty. Arada 5 mınýt ótkende nemis Marıo Roıs tarazy basyn teńestirdi. Al 43-mınýtta Alvaro Morata «Iýventýsty» alǵa shyǵardy.
Búgin túnde 1/8 fınaldyq kezeńniń birinshi oıyndary aıaqtalady. Bul joly alańǵa «Arsenal» (London, Anglııa) – «Monako» (Monako, Fransııa), «Baıer» (Leverkýzen, Germanııa) – «Atletıko» (Madrıd, Ispanııa) shyǵady.
Jaýap oıyndar 10, 11, 17 jáne 18 naýryz kúnderi oınalady.
Damır Qojamqul.
Derek: Football.ua.
Sýret: «Chempıonat.Rý».