Qytaıdyń Haınan aralynda álemge tanymal «Namys doda» sporttyq-tanymdyq teleshoýynyń túsirilimderi ótti. Al maýsymnyń basynda Haıkoý qalasynda (Haınan aralynyń ákimshilik ortalyǵy) álemge tanymal «Namys doda» sporttyq shoý-saıysy bastaldy.
Qazaqstandyq sportshylardyń bir toby ártúrli sport túrleri boıynsha álemdik sporttyq-tanymdyq teleshoý oıynyna qatysý úshin Qytaıǵa jol júrip ketti. Osy jyly oıynǵa Qytaı, Vengrııa, Fransııa, Aljır ókilderi qatysýda. Bul rette, Qazaqstan 2007 jyly 4-shi oryndy, 2008 jyly 2-shi júldeni, 2012 jyly oıyndardyń bas júldesi – 1-shi oryndy ıelengenin aıta ketken jón.
Eske sala keteıik, árbir qatysýshy elden oǵan tanymal tulǵalar: sport túrleri boıynsha álem chempıondary, estrada juldyzdary qatysady. Qazaqstandyq quramanyń bas bapkeri – erejesiz jekpe-jek boıynsha úsh dúrkin álem chempıony, Eýropa men Azııanyń chempıony, erejesiz jekpe-jek boıynsha álem kýbogynyń ıgeri Ardaq Nazarov.
Árbir baǵdarlamada estrada juldyzdarynyń arasynan qatysýshylardy baptaıtyn komanda kapıtandary tańdalady. Qatysýshylarǵa jankúıer bolý úshin birqatar qazaqstandyq estrada juldyzdary jolǵa shyqty: Qazaqstannyń eńbek sińirgen ártisi Maıra Ilııasova, Jeńis Ysqaqova, «MýzArt» toby, aıtysker-aqyn Tóreǵalı Tóreáli, Maqpal Isabekova, Gúlnur Orazymbetova, Rústem Nurjigit, Beıbit Qushqalıev, «Denar» toby, aktrısa jáne ánshi Aıgúl Imanbaeva, aktrısa Ásel Saǵatova, ánshi Ashat Tarǵynov, Aqylbek Jemeneı, júrgizýshi Nurhan Qadyrbaev, telejúrgizýshi jáne prodıýser Láılá Sultanqyzy, ánshi jigitter Sultan Kúntýǵan jáne Aıqyn Tólepbergen, júrgizýshiler Nurlan Qoıanbaev pen Ashat Sadyrbaı. Jobanyń bas prodıýseri – Gaýhar Imanqulova, atqarýshy prodıýseri – Altynbek Rahmetov.
Bir qyzyǵy, bıyl jobanyń erejeleri ózgerdi. Endi qatysýshylar ár oıyn jarysynda jeńis úshin barynsha ter tógýleri tıis. Budan buryn «Chempıon qabyrǵasy» oıyny upaılardy esepteý kezinde mańyzdy jáne sheshýshi bolatyn. Búgingi kúni upaı sanyn sanaý jáne altyn, kúmis, qola medaldar ár oıyn aıaqtalǵan saıyn tabystalyp, eń sońynda oıynnyń barlyq kezeńderi boıynsha jalpy upaı sany qosylady.
Shoýdyń televızııalyq nusqasy «Qazaqstan» telearnasynan aldaǵy kúzde «Namys doda» ataýymen kórsetiledi. Aıta ketý kerek, «Bolshıe gonkı» 1962 jyly Fransııada «Intervilles» (qalaaralyq) ataýymen shyǵyp, álemniń 30-dan astam elinde tanymal bolyp, kóptegen memleketter qatysatyn sporttyq-tanymdyq teleshoýǵa aınaldy. Oıyndardyń negizin sol jyldary Fransııanyń prezıdenti Sharl de Goll qalady, onyń maqsaty halyqtar dostyǵyn nyǵaıtyp, Eýropa jastarynyń kóńilin kóterý edi.
Jobanyń aýdıtorııasy 2 mlrd. adamdy quraıdy, mundaı keń aýqym tek qana Olımpııa oıyndarynda ǵana jınalady eken. Bul televızııa damýyndaǵy álemdik barlyq aǵymdar men baǵyttarǵa sáıkes keletin otandyq televızııadaǵy iri kólemdegi jáne joǵary sapadaǵy birden-bir shoý bolyp tabylady.
Raýan ESQALI