Básekede qalaı oza alamyz?

Batys Qazaqstan oblysyndaǵy «Jambyl» sharýa qojalyǵynyń jetekshisi Bolat ATKEEVPEN áńgime Elimizdiń eńbekker erleri úshin naǵyz báseke, shynaıy báseke, jan alysyp jan berispegenmen tamshylatyp ter tógip, qoldan kelgen múmkindikti jiberip almaıtyn joıqyn báseke endi kelgendeı. Respýblıkamyzdyń Dúnıejúzilik saýda uıymyna kirýi jónindegi másele: «Endi ne bolar eken?» dep áldebireýlerdiń syrttaı qyzyqtaıtyn sharýasy bola almaıdy. Bul kóptiń isi. Kóppen birge kóretin, kóppen birge bólisetin naǵyz uly toı da osy bolmaq. Buǵan aýyldaǵy sharýa baqqan aǵaıyndarymyz da enjar, selsoq qaraı almaıdy. Solardyń biri – Aqjaıyq aýdanyndaǵy «Jambyl» sharýa qojalyǵynyń jetekshisi Bolat ATKEEV. Jumys dese janyn bergen qazaqtyń nar tulǵaly azamatymen áńgimemiz Qazaqstannyń Dúnıejúzilik saýda uıymyna kirýi tóńireginde órbidi. – Siz Memleket basshysynyń Qazaqstan halqyna Úndeýimen tanystyńyz ba? Bul Úndeý sizge qandaı áser qaldyrdy? – Eń aldymen teledıdar arqy­ly tyńdadym. Al Úndeýdiń «Egemen Qazaqstan» gazetinde ja­rııalanǵan mátini shalǵaı núktede, jazǵy jaılaýda jylqy baǵyp júrgen meniń qolyma tek búgin tıip otyr. Ony zer salyp, zeıin qoıyp, birneshe ret astyn syzyp oqyp shyqtym. Osy qysqa da nusqa Úndeý mátini nardyń júgin emes, búkil eldiń júgin arqalap turǵandaı áser qaldyrdy. Budan men elimizdiń aldynda turǵan aýqymdy jumystardyń aýyr salmaǵyn sezingendeı kúı keshtim. – Bóke, Memleket basshysy Úndeýde buǵan deıin de aıtylyp júrgen báseke, básekelestikke tótep berý degen úlken de jaý­apty synǵa erekshe ekpin túsirgenin ańǵarǵan shyǵarsyz. Buǵan ne deısiz? – Meniń uǵymymda báseke ózgege ózin moıyndata bilý, odan ozyp shyǵý degen sóz. Báseke bizdiń halqymyzǵa jat uǵym emes. Osy alty áripten turatyn sózdiń alǵashqy úsh árpi bás delinse budan ári bás tigý, bástesý degen tól uǵymdar shyǵa keledi. Munyń báriniń túp-tórkini men tuqııanynda jáne arǵy astarynda mereıi ústem bolý, belgili bir istiń nátıjesi boıynsha ozyq shyǵý degen oı shyǵady. Osy halyqtyq uǵymnyń búginde máni men mańyzy odan ári tereńdep halyqaralyq syıpatqa ıe bolyp otyr. Biz ózara básekede qaı kezde de jolynan eshqashan jyǵylyp kórmegen, ári bul iste namysyn qoldan bermegen eldiń urpaǵymyz. Qanymyz ben tegimizde bar osy qasıetterimizdi jarqyrap ashatyn sát endi týdy degen oıdamyn. Qazirgi jaǵdaıda básekelestikke qol jetkizýge árbir otandasymyz bir kisideı umtylatyn bolsa, bizge DSU beretin artyqshylyqtardy paıdalana biletinimizdi dáleldeý asa bir qıynǵa túse qoımaıdy. – Endeshe, osyǵan naqty qan­­­daı mysaldar keltire alar edińiz. – Birinshiden, básekege túse alatyn, oǵan túsip qana qoımaı, osy básekede oza alatyn tustarymyzǵa basa nazar aýdarýǵa tıispiz. Eger qatelespesem, respýblıkamyzda mundaı resýrstar men múmkindikter kózi jetkilikti. Biz o bastan jylqy baqqan, ony minse kólik, jese et, ári sýsyn retinde paıdalana bilgen halyqpyz. Bul turǵyda aýrýǵa em, saýǵa qýat dári qymyz dep Jambyl atamyzdyń jyrǵa qosqan óleńi bar emes pe? Básekede oza bilýdiń bir mysaly da dál osy arada dep túsinemin. Bul úshin jylqy ónimderin óńdeýge múldem jańasha memlekettik kózqaras qajet degen oıdamyn. Qymyzdyń patentin nemister ıelenip ketipti dep qur attandap uran salǵanymyzǵa biraz ýaqyt ótti. Endigi jerde bizge paıda bermeıtin mundaı bos sózderdi tyıyp, qazy-qarta, jal-jaıa, buqtyrylǵan jylqy eti sekildi brendimizdi qorǵap qalýǵa, osy arqyly dúnıejúzilik saýda básekesinde ozyp shyǵýǵa baǵyt ustaǵanymyz oryndy. Mysaly, Oral qalasyndaǵy «Kýbleı» JShS qalbyrdaǵy osyndaı jylqy eti ónimderin taıaý jáne alys shetelder naryǵyna shyǵaryp júrgenin bilemiz. Tek mundaı óreli isterdiń órisi keńeıip, ázir ónimderge qajetti shıkizatty óz elimizden paıdalanýǵa qam jasaıtyn bolsaq, budan esh utyl­masymyz anyq. Utylmaý bylaı tursyn, básekeden ozyp shyǵa­tynymyzǵa da kúmánimiz joq. – Áńgimeńizge rahmet.  Áńgimelesken  Temir Qusaıyn,  «Egemen Qazaqstan». Batys Qazaqstan oblysy, Aqjaıyq aýdany.