Qys mezgilinde sý aıdyndaryn muz basady. Osy kezde sýdaǵy tirshilik ıeleri tunshyqpas úshin balyq sharýashylyǵy ınspeksııasynyń qyzmetkerleri men tabıǵat janashyrlary aerasııa jumystaryn júrgizip jatyr.
Batys Qazaqstan oblysynda jergilikti atqarýshy organdar jaýapty mekeme ókilderimen birlesip, balyqty qorǵaý maqsatynda josparly is-sharalar atqardy.
«22 sý aıdynynda 16 888 tesik burǵylanyp, qamys baýlary salyndy. Muz oıylyp, 1h1 metrlik 263 oıyq jasaldy. 3 130 tekshe metr sýǵa aerasııa júrgizildi. Jumystarǵa 180 adam, 60 tehnıka jumyldyryldy», dep habarlady oblys ákiminiń baspasóz qyzmeti.
Mamandardyń aıtýynsha, bul sharalar balyqty qyrylýdan saqtap qana qoımaı, kóktemgi tasqyn kezinde sý aıdyndarynda muz keptelisi bolmaýyna septigin tıgizedi. Sondyqtan jumystar kóktemge deıin jalǵasady.
Jaqynda Oral qalasynyń irgesindegi «Ánes ata» kólinde ekojúıeni saqtaý maqsatynda sý astyna aýa jiberý aksııasy ótti. «EcoSaqshy» qoǵamdyq birlestigi men ekobelsendiler uıymdastyrǵan sharaǵa Syrym aýdanynan kelgen jas ekoqorǵaýshylar toby da qatysty. Tabıǵat janashyrlary qysqa ýaqyt ishinde muz betinen 101 oıyq jasap, sý astyna aýa jiberdi.
«Ekologııalyq tepe-teńdikti saqtaý, tabıǵatty aıalaý – ár azamattyń mindeti. Biz mundaı is-sharany birneshe jyldan beri turaqty ótkizip kelemiz. Qýanyshtysy, búgin qatarymyzǵa Syrym aýdany Alǵabas aýylyndaǵy mekteptiń jas ekoqorǵaýshylary qosylyp otyr. 2022 jyly qurylǵan uıym músheleri aýyl mańyndaǵy Ańqaty ózenin tazalaý, bulaq kózderin ashý, qoqysty suryptaý sekildi ıgi istermen aınalysady eken. Biz olardy qoldap, muz burǵysyn syıǵa tarttyq, oblystyq bilim basqarmasynyń basshysymen kezdesý uıymdastyrdyq. Nurbolat Jumaǵazıev, Tilektes Dúısenbaev syndy azamattar jetekshilik etetin uıym óz jumystary týraly mýltfılm túsirip, nasıhattap júr. Bolashaqta da birlesken josparlarymyz bar», deıdi «EcoSaqshy» qoǵamdyq birlestiginiń jetekshisi Dáýrenbek Sahym.
Batys Qazaqstan oblysy