Májilis depýtaty Erlan Saırov el azamattarynyń Birikken Arab Ámirlikterindegi qymbat úılerine qatysty máseleni quqyqtyq turǵydan tekserýdi surap, Bas prokýratýraǵa resmı hat joldaýǵa nıetti. Áńgime burynǵy joǵary laýazymdy tulǵalar men olardyń jaqyndarynyń ıeligindegi múlik týraly bolyp otyr, dep jazady Egemen.kz
Bul másele Taıaý Shyǵystaǵy sońǵy shıelenis kezinde Dýbaıdaǵy Fairmont The Palm turǵyn úı kesheni mańyna zymyran qulap, órt shyqqannan keıin qaıtadan qyzý talqylana bastady. Áleýmettik jelilerde sol aýdanda el azamattarynyń qymbat páterleri bolýy múmkin degen pikirler tarady.
Dýbaıdaǵy Amerıka konsýldyǵy otqa orandy
Jýrnalıstik zertteýlerge súıensek, atalǵan turǵyn úı keshenindegi 97 páter Qazaqstan azamattaryna tıesili bolýy yqtımal. Olardyń arasynda burynǵy yqpaldy sheneýnikterdiń týystary men jaqyndary bolýy múmkin degen boljam da aıtylyp júr.
Májilis kýlýarynda sóılegen Erlan Saırov bul jaǵdaıǵa quqyqtyq baǵa berilýi qajet dep sanaıtynyn jetkizdi.
«Men Bas prokýratýranyń atyna hat joldarmyn. Olar bul máselege quqyqtyq turǵydan baǵa bersin. Al moraldyq turǵydan qarasaq, bul durys emes. Bul tipti halyqqa qatysty antıgýmandyq áreket», dedi depýtat.
Depýtattyń pikirinshe, eger memlekettik qyzmette bolǵan adamdardyń nemese olardyń jaqyndarynyń shetelde qymbat múlik ıelengeni anyqtalsa, onyń zańdylyǵy men qarjy kózderi muqııat tekserilýi kerek. Sarapshylardyń aıtýynsha, mundaı máseleler qoǵamdaǵy ádilettilik pen ashyqtyq talaptaryn kúsheıtý turǵysynan da mańyzdy.