«Habar» men 24KZ arnalary kóktemgi maýsymda kontent strategııasyn jańartyp, tyń teleónimder toptamasyn kórermen nazaryna usynǵaly otyr. Bul joly arnalar eń aldymen kórermen senimine, salmaqty taldaý men saraptamaǵa jáne qoǵammen ashyq áńgimege basymdyq bermek. Maqsaty – aqparatty jetkizý ǵana emes, onyń mánin ashyp, el kókeıindegi saýaldarǵa jaýap berý, dep habarlaıdy Egemen.kz.
«Habar» Agenttigi» AQ Basqarma tóraǵasy Kemelbek Oıshybaev qazirgi tańda kórermen kúrdeli máselelerdiń anyq ta ádil taldanýyn kútetinin atap ótti.
«Qoǵamdyq habar taratýshy retinde biz kórermenniń suranysyn jiti ańǵaryp, kontentimizdi ashyq pikir almasý men qoǵammen ózara yqpaldastyq qaǵıdatyna negizdep quryp otyrmyz», deıdi ol.
«Habar» arnasynyń efır kestesi jan-jaqty jańartylǵan. Stýdııa dekorasııasy, baǵdarlamalardyń berilý tásili de ózgerdi. Burynnan tanys jobalar jańa reńkke ıe boldy. «О́mir órnegi», «HHI ǵasyr Kóshbasshysy», «Azamat», «Qoǵam pikiri», «Kózqaras», «О́zekti», «Jeti kún», «OınaIQ» sekildi baǵdarlamalar mazmundyq ózegin saqtaı otyryp, jańasha úlgide kórermenge jol tartady. Pikir almasýǵa kóbirek oryn berilip, kórermenmen baılanys nyǵaıa túspek. Sonymen qatar el ómirindegi eleýli oqıǵalar men aıtýly datalarǵa arnalǵan derekti fılmder kórsetiledi. Bul týyndylar ótken men búgindi sabaqtastyryp, ýaqyt tynysyn sezýge baǵyttalǵan.
24KZ arnasy da kórermenge birqatar jańa telejobalardy usynady. Solardyń biri – «El Aldynda» saıası tok-shoýy. Bul – dánekersiz, tikeleı efırde ótetin ashyq alań. Onda memlekettik organdardyń birinshi basshylary BAQ ókilderimen birge azamattardyń saýalyna tikeleı efırde jaýap beredi.
«Prıorıtety» – tanymal telejýrnalıst Asqar Meńdibaev júrgizetin avtorlyq saraptamalyq joba. Baǵdarlama el ishindegi jáne álemdegi úderisterdiń mán-mańyzyn túsindirip, oqıǵanyń astaryna úńilýge múmkindik beredi. Al «Alem Talk» halyqaralyq úderister men olardyń Qazaqstanǵa yqpalyn keń aýqymda taldaıtyn telejoba. «Anyq Time» – aqıqat pen jalǵan aqparattyń ara-jigin ajyratýǵa baǵyttalǵan aptalyq faktchekıng jobasy. Qazaq jáne orys tilderinde shyǵatyn baǵdarlamada rezonansty taqyryptar saralanyp, naqty keıster taldanady, kórermenge aqparatty óz betinshe tekserýdiń praktıkalyq joldary usynylady.
Sonymen qatar efırge apta saıyn «Teń múmkindik / Raznye-Ravnye» áleýmettik telejobasy shyǵady. Ár shyǵarylymda ata-analardyń shynaıy taǵdyry, erekshe balalardyń ómir joly, memleket tarapynan kórsetiletin qoldaý sharalary jáne ınklıýzıvti damýdyń nátıjeli tájirıbeleri keńinen sóz bolady. Baǵdarlamada kedergisiz orta qalyptastyrýdyń naqty qadamdary kórsetilip, teń múmkindikke negizdelgen qoǵam qurý joly jan-jaqty áńgimelenedi. Buǵan qosa «President», «Túıin», «Májilis Life» baǵdarlamalary da efırde óz jumysyn jalǵastyra beredi.
Aıta keteıik, jańa maýsymda sıfrlyq kontentke erekshe kóńil bólinedi. «Habar» Agenttigi áleýmettik jeliler en YouTube platformasynda belsendilikti arttyryp, jas aýdıtorııaǵa arnalǵan formattardy damytýdy josparlap otyr. Qazirgi tańda medıaholdıngtiń YouTube arnasynda shamamen 8 mıllıon jazylýshy bar, al áleýmettik jelilerdegi aýdıtorııasy 3 mıllıonǵa jýyq. Aldaǵy ýaqytta 4 podkast, 2 Instagram-serıal jáne «Qonaqjaı» jobasy iske qosylady.
«Qonaqjaı» baǵdarlamasy Qazaqstannyń tabıǵatyn, aımaqtardyń tynys-tirshiligin jáne qazaq halqynyń dástúrli qonaqjaılyǵyn tanystyrýǵa arnalǵan. Joba arqyly kórermen elimizdiń ár óńiriniń ereksheligi men salt-dástúr alýandyǵyn jaqynyraq tanı alady.
Osylaısha, «Habar» men 24KZ arnalary kóktemgi maýsymda mazmuny tereń, qoǵam suranysyna jaýap beretin, jarqyn emosııalarǵa toly telejobalar usynyp, medıakeńistiktegi 31-shi maýsymyn ashqaly otyr.