Azamattyq jaýapkershilikti ustanyp, el bolyp jumylǵan jumystyń negizinde 15 naýryzda Ata zańdy qoldaǵandar 80 paıyzdan asty. Keshe ǵana saltanatty jıynda Prezıdent Qasym-Jomart Toqaev jańa Konstıtýsııamyzdy qabyldady. Halyqtyń keń qoldaýymen qabyldanýy negizgi qujattyń legıtımdigin arttyrady jáne reformalardy júzege asyrýda turaqty negiz beredi.
Búginde elimiz damý jolyndaǵy óte jaýapty kezeńdi ótkerip jatyr. Otandastarymyz tarapynan joldanǵan 10 myńnan asa usynys negizinde 130 adamnan turatyn Konstıtýsııalyq komıssııa qurylyp, jańa Ata zańnyń jobasy usynyldy. 12 otyrys, odan bólek, seksııalyq toptardyń, BAQ ókilderi, zańgerler men lıngvıster, fılologter men saıasattanýshylardyń súzgisinen ótken mańyzdy qujat referendýmǵa shyǵaryldy. Keıin Jalpyulttyq koalısııa músheleri jańa Konstıtýsııany alys-jaqyn ornalasqan otandastarymyzǵa egjeı-tegjeıli túsindirdi. О́zim de óńirlerde bolyp, jergilikti turǵyndarmen ótken talqylaýlarǵa qatystym. Sol kezdesýler barysynda halyqtyń qyzyǵýshylyq tanytyp, qyzý qoldap otyrǵanyna kóz jetkizdim.
Ata zań – zańdyq qadam ǵana emes, qoǵam men memleket arasyndaǵy senimniń nyǵaıýynyń aıqyn kórinisi. Qabyldanǵan Konstıtýsııaǵa sáıkes, QHA jumysy jańa formatta jalǵasady. Assambleıa men Ulttyq quryltaı negizinde Qazaqstan Halyq keńesi qurylady. Bul jańa ınstıtýt quramynda etnomádenı birlestikterdiń ókilderi, qoǵamdyq uıymdar, jergilikti máslıhattar men qoǵamdyq keńester ókilderi birlese jumys istep, qoǵamdaǵy turaqtylyqty, kelisim men yntymaqty nyǵaıtýǵa qyzmet etedi.
Endigi basty maqsat – Konstıtýsııany halyqqa túsindirý, nasıhattaý jáne qoǵamnyń naqty ómirine engizý. Bul úshin kez kelgen baǵyttaǵy uıymdar men ǵalymdardyń róli erekshe mańyzdy. Sebebi olar jańa zańdardyń mánin tereńinen túsindirip, jurtshylyqtyń suranysyn zań jobalaryna durys engizýge kómektesedi.
Jańa Konstıtýsııany qabyldaý – jaýapkershiliktiń bastamasy. Endigi mindet – ony qoǵamǵa jetkizý, sol arqyly ǵana biz turaqty, ádiletti jáne sapaly qoǵam qura alamyz.
Álisher SATVALDIEV,
Senat depýtaty