Keıingi jyldary Qazaqstanda ǵylymdy qoldaý boıynsha mańyzdy qadamdar jasalyp keledi. Jas ǵalymdarǵa arnalǵan arnaıy granttyq qarjylandyrý baǵdarlamalary, ǵylymı ınfraqurylymdy jańartý, halyqaralyq taǵylymdamalar men ǵylymı kollaborasııalarǵa jol ashý – munyń barlyǵy zertteýshilerge jańa múmkindikter beredi. Ásirese, qoldanbaly zertteýler men naqty ındýstrııalyq máselelerdi sheshýge baǵyttalǵan jobalarǵa basymdyq berilýi ǵylym nátıjeleriniń el ekonomıkasyna tikeleı áser etýine yqpal etedi.
Otandyq ǵylym búginde jańa sapaly kezeńge ótip jatyr. Jasandy ıntellekt, sıfrlyq tehnologııalar, jańa materıaldar, energetıka, bıomedısına sııaqty baǵyttarda qazaqstandyq ǵalymdardyń áleýeti joǵary. Eń bastysy bizde tereń bilimdi, halyqaralyq deńgeıde básekege qabiletti jas zertteýshiler býyny qalyptasyp keledi. Bul – elimizdiń ǵylymı bolashaǵyna degen úlken senim.
Memlekettik qoldaý ǵylymǵa kelgen jastardyń sanyn ǵana emes, sapasyn da arttyrady. Ǵalym úshin onyń eńbeginiń baǵalanýy, ıdeıasynyń qoldaý tabýy jáne qoǵamǵa paıda ákelýi – úlken motıvasııa. Sondyqtan búgingi marapatty men otandyq ǵylymǵa kórsetilgen senimniń belgisi, al ǵylym adamdaryna berilgen qurmetti el damýyna qosylǵan úlestiń moıyndalýy dep qabyldaımyn.
Ǵylymǵa salynǵan ınvestısııa – bolashaqqa ınvestısııa. Sondyqtan ǵylymdy qoldaý saıasaty jalǵasyn taýyp, zertteý nátıjeleri eldiń turaqty damýy men halyqaralyq bedelin arttyrýǵa qyzmet ete beredi dep senemin. Al men úshin osyndaı marapat ıeleriniń arasynda bolý – úlken qurmet qana emes, sonymen birge zor jaýapkershilik. Men ony elimizdiń ǵylymyn damytýǵa, jas zertteýshilerdiń jańa býynyn tárbıeleýge, qoǵam men ekonomıkanyń naqty suranystaryna jaýap beretin ǵylymı sheshimder usynýǵa degen senimniń belgisi retinde qabyldaımyn.
Búgingi kásibı mereke aıasynda kórsetilip jatqan qurmet pen marapat – tek jeke jetistikke berilgen baǵa emes, bul elimizdegi ǵylym salasyna kórsetilip otyrǵan júıeli memlekettik qoldaýdyń naqty kórinisi dep bilemin. Ǵylymdy damytý – memlekettiń uzaqmerzimdi básekege qabilettiligin, tehnologııalyq táýelsizdigin jáne adam kapıtalynyń sapasyn aıqyndaıtyn mańyzdy baǵyt.
Ásııa ERMUHAMBETOVA,
Ulttyq ǵylym akademııasy janyndaǵy Jas ǵalymdar prezıdıýmynyń múshesi